Улаанбаатар хотын инженерийн дэд бүтэцэд нийт 1153 төсөл, арга хэмжээ хэрэгжүүлсэнээс хамгийн өргөн хүрээнд хийгдсэн ажил нь Улаанбаатар хотын дулаан хангамжийн 3А,Б,В шугамыг ф600/500 болгон өргөтгөх байсан юм. Уг ажлыг зургаа дугаар сарын долооны өдрөөс эхлэн найман сарын 15-ны өдрийг хүртэл хийж гүйцэтгэх төлөвлөгөөтэй байсан ч ийнхүү хугацаанаасаа 10 хоногийн өмнө нээгдлээ. Анх Төв шуудангаас баруун дөрвөн зам хүртэлх дулааны шугамыг 1987 онд барьж, ашиглалтанд оруулсан бөгөөд дулааны шугамын ачааллыг багасгах, гэр хорооллын дахин төлөвлөлтийн ажилтай уялдуулан шинэчилэн барьлаа. Тус замыг 3 үе шаттайгаар хааж зам засвар, шугам хоолой солих, өргөтгөн шинэчлэх ажлыг хийж гүйцэтгэсэн юм. Уг ажлыг 12,6 тэрбум төгрөгийн төсөвт өртгөөр Хөгжлийн банкны санхүүжилтээр, Хангирцаг ХХК, Эй Би Жи Энерги ХХК, Гандирс орд гэсэн компаниуд хамтран гүйцэтгэсэн. Шинэ дулааны шугам нь өмнөхөөсөө хоолойноос илүү өргөссөн буюу 300 диаметртэй хоолойг 500, 400 диамертэйг 600-аар сольсон бөгөөд 20-30 жилийн баталгаа өгч байгаа юм.
       Тууз хайчилах нээлтийн ажиллагаанд НИТХ-ын дарга Д.Баттулга, НЗДТГ-ын Зам тээвэр, дэд бүтэцийн асуудал хариуцсан орлогч Н.Гантөмөр, тус газрын Хот байгуулалт, хөрөнгө оруулалт хариуцсан орлогч С.Очирбат, УСУГ-ын дарга С.Үнэн, Нийслэлийн авто замын газрын дарга Д.Нанзаддорж, Нийслэлийн цагдаагийн газрын дарга Ч.Жаргалсайхан, НГХХГ-ын дарга Ш.Ганхуяг зэрэг албаны хүмүүс болоод ажлыг хийж гүйцэтгэсэн компаниудын төлөөлөл оролцлоо.
НИТХ-ын дарга Д.Баттулга хэлэхдээ, “Өвлийн бэлтгэл ажил ид явагдаж байгаа үед дулааны шугам сүлжээний 3А,Б,В хэсгийг шинээр барьлаа. Энэхүү шугамын ажлыг анх 2013 оны 04 сард яригдаж байсан. Ингээд Засгийн газарт оруулж 2013 оны найман сард шинэчлэх тогтоол гаргасан. Үүнээс хойш бэлтгэл ажил хийгдсээр өнөөдөр ашиглалтанд орж байна. Ингэснээр шугамыг өргөтгөж, хотын төвийн энэ бүсийн дулаан хангамж сайжирч байгаа.” хэмээсэн юм.
УСУГ-ын дарга С.Үнэн нээлтийн үйл ажиллагааны үеэр, “Ажлын хэсгийн ахлагчийн хувьд хот төлөвлөлтийн хамгийн чухал эд эс болсон шугам сүлжээний ажлыг богино хугацаанд чанартай хийж өгсөн 3 компаний хамт олонд талархал илэрхийлье хэмээн тодотгоод, нийслэлд их засвар хийх ажлын нэгээхэн хэсгийг хийж дуусгалаа. Цаашид 11Г,Д зэрэг шугам сүлжээний ажил зураг төслийн шатандаа явж байна, удахгүй шинэчилнэ.” хэмээн дурьдсан юм.