Орон сууцны зах зээлд борлуулалт хийж байгаа, судалгаанд хамруулсан 209 шинэ төслийн 1 ам метрийн дундаж үнэ 2015 оны 7-р сарын байдлаар 2,271,452 төгрөг байжээ. Үүнээс хамгийн хямд буюу 1 ам метр нь 1,100,000  төгрөгийн үнэтэй төсөл СХД-т байсан бол хамгийн өндөр буюу 1 ам метр нь 6,000,000 төгрөгийн үнэтэй төсөл СБД-т байрлаж байгааг судлаачид тогтоосон байна. Харин шинэ орон сууцны дундаж үнэ нь хамгийн өндөр байгаа ХУД-т ам метр нь 2,400,000, хамгийн хямд байгаа Налайх дүүрэгт 1,275,000 төгрөг байгаа аж.  

       Мөн энгийн болон дундаж зэрэглэлийн орон сууцны ам метрийн дундаж үнэ 2,000,000, дээд болон тансаг зэрэглэлийн орон сууцны дундаж үнэ 3,495,000 төгрөг байгаа юм.

     Шинэ орон сууцны ам метрийн үнийг энэ оны байдлаар ерөнхийд нь дүгнэж үзвэл 1-7-р сарыг дуусталх хугацаанд буурсан дүнтэй ажиглагджээ. Харин өмнөх сартай харьцуулахад 7-р сард шинэ төслийн үнэ буурсан аж.
           
     Өнөөдрийн байдлаар төслүүдийн 47 хувь буюу 98 төсөл нь ашиглалтанд орсон бэлэн байр борлуулж байна. 45 хувь буюу 94 төсөл энэ онд, 6 хувь буюу 13 төсөл нь 2016 онд, 2 хувь буюу 4 төсөл нь 2017 онд ашиглалтанд орохоор төлөвлөгджээ.

   Цувралаар хүргэж буй “Real Properties Ulaanbaatar” судалгаа, менежментийн компанийн эрхлэн гаргасан “УЛААНБААТАР ХОТЫН ҮХХ-ИЙН ЗАХ ЗЭЭЛИЙН 07-Р САРЫН СУДАЛГАА”-ны Шинэ орон сууцны зах зээлийн тоймыг дэлгэрэнгүй танилцуулъя.