АНУ-ын Денвер хотын захирагч Майкл Ханкок тэргүүтэй төлөөлөгчдийн Улаанбаатар хотод хийсэн айлчлал албан ёсоор өндөрлөсөн. Айлчлалын хүрээнд “Чингис Хаан” олон улсын нисэх онгоцны буудалтай танилцах арга хэмжээний үеэр “Стаплтон” нисэх буудлын дахин төлөвлөлтийн туршлагын талаар санал солилцох уулзалтыг зохион байгуулсан байна.

     Денвер хот нь 25 жилийн өмнө нисэх онгоцны буудлаа дахин төлөвлөж байжээ. Энэ нь өдгөө дэлхийн хамгийн том 10 нисэх онгоцны буудлын тоонд ордог аж. Харин Хөшигтийн хөндийн нисэх онгоцны буудлыг хоёр жилийн өмнө тус буудлыг барьсан жишгээр эхлүүлжээ.

     Дээрх жишгээр туршлага судалж, Хөшигтийн хөндийн нисэх онгоцны буудал ашиглалтанд орсны дараа Нисэх, Яармагийг хот болгон хөгжүүлж, “Чингис хаан” олон улсын нисэх буудлыг дахин төлөвлөж, Денвер хоттой хамтран ажиллахаар болсон талаар Нийслэлийн засаг дарга бөгөөд Улаанбаатар хотын захирагч Э.Бат-Үүл мэдэгдсэн юм.

     2016 онд Улаанбаатар хотод АСЕМ-ын дээд хэмжээний уулзалтын зохион байгуулах гэх мэт ойрын жилүүдэд болох томоохон арга хэмжээнүүдэд ирэх зочид, төлөөлөгчдийг хүлээн авах шаардлага тулгарч байгаа. Тиймээс тус буудалд онгоц хөөрөх, буух зурвасыг өргөтгөх, транзит заал байгуулах, зорчигчдын танхимуудыг өргөтгөх ажлуудыг хийж байгаа юм.

     Одоогоор засвар шинэчлэлийн ажилд 20.7 тэрбум төгрөг зарцуулаад байгаа. Засварын ажлыг энэ оны 9-р сарын 30-ны өдөр дуусгавар болгож, ашиглалтанд хүлээлгэн өгөх ажээ.