“Буянт ухаа” хорооллын нэгдүгээр ээлж сугалаа суглуулж хамрагдах хүсэлтэй олон ч иргэд байр авч чадалгүй халаглаж үлдсэн. Харин “Буянт ухаа 2” төсөлд сугалаа суглаж, азаа турших шаардлагагүй болж, 35 дээш насны хувийн хэвшилд ажилладаг, хувиараа бизнес эрхэлдэг иргэн бүрт нээлттэй байх ажээ.
    Өнөөдөр Төрийн Орон Сууцны Корпорацийн тэргүүн дэд захирал Д.Алтанхуяг болон тус газрын Маркетинг, борлуулалтын хэлтсийн дарга Т.Гэрэлт-Од нар “Буянт ухаа 2” хорооллын захиалга авахтай холбогдуулан хэвлэлийн бага хурал хийлээ.
Төслийн нэгдүгээр ээлжийн 2592 айлын орон сууцны барилга, 240 хүүхдийн цэцэрлэг, инженерийн дэд бүтцийн ажил зэргийг түрүү жилийн зургаан сард эхлүүлсэн. Одоогоор төслийн гүйцэтгэл 60 гаруй хувьтай явж байгаа бөгөөд энэ арван сард ашиглалтад өгөх юм. Захиалга авах нөхцлийн журамд заасан “хувийн ашиг олох зорилгоор түрээслэхгүй, худалдаа үйлчилгээ явуулахгүй” гэсэн заалт хэвээр мөдөгдөнө.
Албан ёсоор 9 сарын 07-ноос захиалга авч эхлэнэ. Ингэхдээ орон сууцны 8 хувийн зээлд хамрагдах боломжтой эсэхээ зээл авах банкнаасаа судалсан байх, байр хүссэн өргөдөл, байрны урьдчилгаа 10 хувийг байгууллагын дансанд байршуулах аж.
Эхний ээлжийн 48 барилга 2-3 өрөөнөөс бүрдсэн ба нэг давхартаа зургаан айлтай байхаар төлөвлөжээ. Нэг мкв-ийн үнэ 1,350,000 төгрөг байхаар баталсан байна. Нэгдүгээр ээлжийн хорооллыг бодвол үнэ өндөр байгаа нь шинэ суурьшлын бүс учраас шинээр инженерийн дэд бүтэц, цахилгаа дулаан, бохирын шугам зэргийг барих ажлын өртөг орон сууцны үнэд нөлөөлсөн гэнэ.
        Хэрэв байраа буцаах эсвэл банкны зээл гараагүй тохиолдолд 5 хувийн торгуул ногдуулаар болжээ.