ЛЕГО сонирхогч, судлаач Арнон Розан барилга байшингийн угсралтыг хурдан шуурхай болгох зорилгоор харилцан холбоотой бүрэн хэмжээний ЛЕГО бүтээжээ. “EverBlock” нэртэй энэхүү ЛЕГО нь тавилга угсралт, тоног төхөөрөмж суурилуулах, онцгой байдлын хоргодох байр ч барих боломжтойгоор сайжруулан хийсэн полипропилен хавтангийн модульяр систем юм.

     Энэ хавтан нь 14 төрлийн өнгө, гурван янзын хэмжээтэйгээр үйлдвэрлэгдэх боломжтой. Үүнд бүтэн хэмжээний урт нь 30 см, хагас нь (15 см), жижиг нь 7.5 см байх аж. Харин жин нь 1-2 паунд буюу 450-900 гр орчим байна.

     Хэсэг тус бүрийг хооронд нь дээш доош эвлүүлж угсрахад хялбар, хавтангуудыг хооронд нь даралтын хүчээр холбож угсарна. Нэгж тус бүрийн систем нь өөрөө маш боловсронгуй учраас хэрэглэгч уг гурван төрлийн “EverBlock” хавтанг хэрэглэхэд маш хялбар. Та ямар ч барилга, байгууламжид хэрэглээд, дараа нь түүнийгээ дахин задлах, дахин угсрах боломжтой. Барилгад ашгласан хавтангуудыг дахин өөр объектуудад ч хэрэглэж болно. “EverBlock” хавтанг бүтээсэн нь Ногоон барилгын хөгжилд чухал үүрэг гүйцэтгэх алхам боллоо гэж үйлдвэрлэгчид урамтай байгаа аж.

     Түүнчлэн уг хавтанг их өргөн хүрээнд, олон төрлийн хэрэглээнд ашиглаж болно. Тухайлбал, цахилгааны утас, гэрэл, модон болон төмөр толгойгүй хадаасыг бэхлэх зэргээр ч хэрэглэж болдог аж.