Хүйтний улиралд дулаан шугам сүлжээний засвар, шинэчлэлийн ажлыг хийх боломжгүйгээс зуны гурван сард хийж гүйцэтгэдэг. Нийслэл хотын хэмжээнд гурваас дээш давхрын барилгуудын 90 гаруй хувийг дулаанаар хангадаг “Улаанбаатар Дулааны Сүлжээ” компани энэ онд шугамын шинэчлэл, засварын ажлаа төлөвлөсний дагуу, хугацаанд нь гүйцэтгэж байгаа ажээ. Энэ жилийн хувьд тус компани хотын 20 орчим байршилд 5.6 тэрбум төгрөгөөр 4.3 км дулааны шугамыг сольж, шинэчилсэн байна. Ингэснээр төвийн дулааны шугам сүлжээнд холбогдсон айл өрх, албан байгууллагууд өвөлжилтөнд бэлэн болж байна гэсэн үг.

     “Улаанбаатар Дулааны Сүлжээ” компани нь жил бүр 10 орчим км шугам сүлжээг шинэчилдэг. Харин энэ онд НЗДТГ-ын захиалгаар, Хөгжлийн банкны хөрөнгөөр УДЭТ-аас Төв шуудан, Төв шуудангаас Баруун 4 зам хүртэлх авто зам доогуурх дулааны шугамыг бүрэн хэмжээгээр шинэчилж, 300-гийн диаметртэй шугамын огтлолыг 500, 600 болгон өргөтгөжээ.

     Ингэснээр хотын төвийн хэсгийн дулаан хангамжийн найдвартай ажиллагаа сайжирч, гэр хорооллыг шугам сүлжээнд холбох ажилд зохих хэмжээгээр нөлөөлөх, 7-р хороололд байгаа 2000 гаруй айл өрх, барилгыг дулаанаар хангах боломж бүрдэж байгаа юм.

     Ирэх 10-р сард Амгалангийн Дулааны Станцыг ашиглалтанд оруулахтай холбоотойгоор 700м дулааны шугамыг төвлөрсөн дулаантай холбох ажил мөн дуусч байгаа. Энэ нь хотын зүүн хэсгийн барилга байгууламжийг дулаанаар хангах ачааллыг бууруулахад зохих нөлөөг үзүүлэх ажээ.