“Барилга Орон Сууц 2015” үзэсгэлэн яармагийн хүрээнд зохион байгуулсан Бизнес эрхлэгчдийн уулзалт семинар өнөөдөр амжилттай болж өндөрлөлөө. Уулзалт семинар нь барилгын салбарт бизнес эрхлэгчдэд тулгамдсан асуудал, зах зээлийн орчин, тэдгээрийг шийдвэрлэх арга зам гэсэн сэдвээр салбарын төрийн болон төрийн бус байгууллага, аж ахуйн нэгж компаниудын төлөөллийн дунд хэлэлцүүлэг өрнүүлж, мэдээлэл өгөх зорилготойгоор зохион байгуулагдсан юм. Уулзалтанд 100 гаруй аж ахуйн нэгж байгууллагын төлөөлөл оролцлоо.

     Мөн Барилга, Хот Байгуулалтын яам, Нийслэлийн Засаг Даргын Тамгын газрын харъяа ЭЕТГ, “Улаанбаатар Дулааны Шугам Сүлжээ”, “Цахилгаан Түгээх Сүлжээ” ТӨХК, УСУГ зэрэг төрийн байгууллагын төлөөллүүд болон “MMCG”, “Контент Маркетинг” компанийн захирлууд илтгэл тавьж, бизнес эрхлэгчдийн сонирхсон асуултанд хариулсан юм.

     Төрийн байгууллагуудын зүгээс Улаанбаатар хотод бүтээн байгуулалтын ажил өрнөхөд тулгарч буй саад бэрхшээл, тэдгээрийг шийдвэрлэх арга болон цаашид авч хэрэгжүүлэх төлөвлөлтийн талаар бизнес эрхлэгчдэд дэлгэрэнгүй мэдээлэл өгсөн.

     Харин маркетинг, судалгааны чиглэлээр мэргэшсэн “MMCG” компанийн захирал Д.Бум-Эрдэнэ, “Контент Маркетинг” компанийн захирал Д.Гэрэлт-Од нар барилгын компаниудад хэрхэн үр дүнтэй маркетингийн бодлого явуулах, өндөр үр өгөөжтэй борлуулалт хийх талаар бодит судалгаа, сонирхолтой жишээ, тоо баримтанд тулгуурласан илтгэл тавьсан нь цаг үеэ олсон маш оновчтой мэдээлэл байсныг бизнес эрхлэгчид онцолж байлаа.

     Монгол Улсад Барилгын салбар үүсч хөгжсөний 89 жилийн ойг тохиолдуулан зохион байгуулж буй “Барилга Орон Сууц 2015” үзэсгэлэн яармагийг угтан хийсэн энэхүү уулзалт семинарыг жил бүр уламжлал болгон явуулна гэдгийг ерөнхий зохион байгуулагч Барилгын Зөвлөгөө Мэдээллийн төвөөс мэдэгдлээ.