Монгол Улсын барилгын салбарын хөгжил дэвшил, өнгө төрх, ололт амжилтыг олон нийтэд сурталчлах, иргэдэд бодит ойлголт өгөхөөр жил бүр уламжлал болгон зохион байгуулагддаг барилгын салбарын хамгийн том үзэсгэлэн яармаг өнөөдөр Мишээл Экспо төвд нээлтээ хийлээ.

      Монгол Улсад Барилгын салбар үүсч хөгжсөний 89 жилийн ойд зориулан, “Бүтээн Байгуулагчдаа Дэмжье” уриан дор явагдаж буй “Барилга Орон Сууц 2015” үзэсгэлэн яармагийн ерөнхий зохион байгуулагчаар Барилгын Зөвлөгөө Мэдээллийн төв, хамтран зохион байгуулагчаар Барилга, Хот Байгуулалтын яам болон Нийслэлийн Засаг Даргын тамгын газар ажиллаж байна.

     Барилгын салбарт шинэ төсөл хэрэгжүүлэгчид, дэвшилтэт технологи болон барилгын материал үйлдвэрлэгчдийг олон нийтэд сурталчлан таниулах зорилготой уг үзэсгэлэн 8 дахь жилдээ тасралтгүй зохион байгуулагдаж байгаа юм.

     Үзэсгэлэнгийн нээлтийн үйл ажиллагаанд Барилга, Хот Байгуулалтын яам, Барилгын Хөгжлийн Үндэсний төв, Нийслэлийн Засаг Даргын Тамгын газар зэрэг төрийн байгууллагын төлөөлөл, газрын дарга нар болон Барилгын салбарын төрийн бус байгууллагын тэргүүд, мэргэжилтнүүд оролцлоо. Мөн үзэсгэлэнгийн нээлтэнд зориулж МУГЖ, Зууны манлай дуучин Б.Сарантуяа ая дуугаа өргөлөө.



“Барилга Орон Сууц 2015” үзэсгэлэн яармагийн Ерөнхий зохион байгуулагч Барилгын Зөвлөгөө Мэдээллийн Төв “Барилга.МН”-ний Удирдах зөвлөлийн дарга Г.Батсүх, Барилга, Хот Байгуулалтын Яамны Шинжилгээ Үнэлгээ, Дотоод Аудитын хэлтсийн дарга С.Бат-Эрдэнэ, Нийслэлийн Засаг Даргын орлогч С.Очирбат, Барилгын Хөгжлийн Үндэсний төвийн ТУЗ-ийн дарга Г.Мягмар, “Барилга.МН” сэтгүүлийн ерөнхий эрхлэгч Ч.Баатарсүрэн нар үзэсгэлэн яармагийн хүндэтгэлийн тууз хайчилж, нээлт албан ёсоор эхэлснийг зарлалаа.


     Энэ намрын орон сууцны үнэ ханшийг тодорхойлж, ирэх жилийн зах зээлийн чиг хандлагыг харуулах чухал ач холбогдолтой энэхүү үзэсгэлэнд шинэ төсөл хэрэгжүүлэгч, барилгын материал үйлдвэрлэгч, дэвшилтэт технологи нэвтрүүлэгч 120 гаруй аж ахуйн нэгж оролцож байна.



     Үзэсгэлэнд хүрэлцэн ирснээр та бүхэн иргэдийг орон сууцжуулах хөтөлбөрийн хүрээнд баригдаж байгаа болон ипотекийн 8 хувийн зээлд хамрагдахр боломжтой 80 гаруй орон сууцны төслийн мэдээллийг авах боломжтой.

     Оролцогч аж ахуйн нэгж, байгууллагуудын зүгээс иргэдэд төлбөрийн уян хатан нөхцөлтэй, хямд энгийн болон болон бизнес, тансаг зэрэглэлийн бүх төрлийн орон сууцыг танилцуулна.

     Тухайлбал, гадаадад аялах хонжворт сугалаатай, гэрийн иж бүрэн тавилга бэлгэнд дагалдуулах, төлбөрийн нөхцлийг хөнгөвчилсөн урамшуулалт худалдаа явуулж буй “Хийморь 13”, “Elegance Luxury”, “Энхжин”, “Elizabeth”, “Ивээл”, “Саруул”, “Аман Хуур 2”, “Хар хорин”, “Миний гэр”, “Morning Star Residence”, “MyTown”  зэрэг орон сууцы хотхон, хорооллуудтай танилцах боломжтой.

     Үзэсгэлэн амралтын өдрүүдийг дуустал үргэлжлэх тул та бүхэн амжиж ирээрэй.