“Барилга Орон Сууц 2015” үзэсгэлэн яармаг 2015 оны 8-р сарын 21-нээс 23-ны өдрүүдэд Мишээл Экспо төвд үргэлжиллээ. Хөл хөдөлгөөн тасрахгүй, үзэх харах зүйл ихтэй тус үзэсгэлэнд оролцогч компаниудын сэтгэгдлээс хүргэе.

“Стандарт Проперти Групп” ХХК-нийн ерөнхий менежер Г.Анхболд:



Энэ удаагийн үзэсгэлэн яармагт нэлээд олон компани, оролцогчид хамрагдлаа. Мөн үзэсгэлэнгийн зохион байгуулалт маш сайн болж байна. Манай компани энэ удаагийн үзэсгэлэнд гэр хорооллын дахин төлөвлөлтийн “Шинэ Толгойт” төслөөр оролцож байна.

“Шинэ Толгойт” нь 2,700 айлын орон сууцны төсөл юм. 26.2 га газарт хэрэгжүүлж байгаа төсөл. Онцлог давуу тал ихтэй, маш өргөн хүрээг хамарсан олон айлын цогцолбор юм. Төсөлд улсын хэмжээний хоёр дунд сургууль, цэцэрлэг баригдана. Нийт талбайн 30-40 хувийг ногоон байгууламж эзэлнэ. Өөрөөр хэлбэл, гэр хороолол дахь анхны ногоон байгууламж бүхий цогцолбор гэдгээрээ онцлогтой. Гэр хороолол гэхээр хүмүүст шороо тоос бужигнасан газар мэт сэтгэгдэл төрдөг. Тэгвэл бид энэ ойлголтыг эвдэж, ногоон байгууламж бүхий хороолол байгуулахаар зорьж байна. Бүрэн цутгамал хийцтэй хэдий ч үнийн хувьд байж болох хамгийн хямд үнэ буюу 1,480,000 төгрөгийн үнийг иргэдэд санал болгож байна. Энэ маань дундаж орлоготой иргэд рүү чиглэсэн төсөл юм. Төсөл 2018 он хүртэл 4 жилийн хугацаанд хэрэгжинэ. Энэ оны 12-р сард төслийн эхний ээлж буюу 20 блок барилгаас 270 айлын орон сууц ашиглалтанд орно.

“AGZ” Дулаан хангамжийн тоног төхөөрөмжийн компанийн менежер Г.Солонго:



Өнөөдөр үзэсгэлэнгийн сүүлийн өдөр хөл хөдөлгөөн маш их байна. Үр дүнтэй, өгөөж ихтэй сайхан үзэсгэлэн боллоо гэж дүгнэж байна. “AGZ” компани нь “Барилга Орон Сууц 2015” үзэсгэлэн яармагт нэлээд өндөр ач холбогдол өгч, жил бүр оролцдог болсон. Сэтгэгдэл маш өндөр байна.

“AGZ” нь дулаан хангамжийн тоног төхөөрөмжийн угсралтын чиглэлээр үйл ажиллагаа явуулдаг. Манай компани Данийн алдарт “Danfoss” брэндийн тоног төхөөрөжмүүдийг Монголд оруулж ирдэг. Энэ чиглэлээрээ ажиллаад манай компани багагүй туршлага хуримтлууллаа.

Монголынхоо зураг төсөл, барилгын компаниудыг дэмжиж, сургалт зохион байгуулж ажилладаг. Шинэ тоног төхөөрөмжийн танилцуулга мэдээллээр хангаж ажиллаж байгаа. Ер нь энэ үзэсгэлэнд оролцож байгаа компаниудын ихэнх нь манай компанийн хамтрагч байгууллагууд юм. Манай тоног төхөөрөмжийг ашигладаг компаниуд их оролцож байна. Тус үзэсгэлэнгээр дамжуулаад манай компани өндөр чанартай, сүүлийн үеийн тоног төхөөрөмжүүдийг танилцуулж байна. Мөн эрчим хүчний хэмнэлттэй гэдгээрээ давуу талтай.

“Смарт Крафт” ХХК-нийн цахилгааны инженер Б.Оюунбаатар:



Манай компани хамтран ажиллагч, түнштэй болох зорилгоор энэхүү үзэсгэлэнд оролцож байна. “Барилга Орон Сууц 2015” үзэсгэлэн яармагт оролцож байгаадаа манай компанийн зүгээс баяртай байна. Манай компани нь үйлдвэрлэлийн автоматик цахилгаан бүх төрлийн цогц шийдлийг боловсруулах чиглэлээр үйл ажиллагаа явуулдаг. Эрчим хүч, барилга, дэд бүтцийн чиглэлээр зураг төсөл боловсруулахаас гадна дэлхийн алдартай шилдэг брэндүүдийн тоноглолуудын тусламжтайгаар угсралт, суурилуулалтыг хийдэг.

Цаашдаа цахилгааны автоматжуулалтын системээр төрөлжиж, салбартаа тэргүүлэгч болох зорилт тавин ажиллаж байна.

“T&G” компанийн гүйцэтгэх захирал Ц.Гантулга:



Барилгын Зөвлөгөө Мэдээллийн төвийн зохион байгуулж байгаа энэхүү үзэсгэлэнд манай компани жил бүр оролцдог. Жил ирэх тусам үзэсгэлэн өргөн дэлгэр болж, зорьж ирэх иргэдийн тоо нэмэгдсээр байна.

Манай “T&G” компани 1996 оноос хойш үйл ажиллагаа явуулж байгаа. Дээврийн материал, Германы гражийн хаалга, Европ, Шинэ Зеланд, ОХУ-ын дээврийн материал болон зочид буудал гэсэн үндсэн дөрвөн чиглэлээр үйл ажиллагаа явуулдаг. Энэ удаагийн үзэсгэлэнд бид дээврийн болон цонхны хаалтыг танилцуулах зорилгоор оролцож байна. Шинэ Зеландын “Decra” брэндийн чулуун болон металл дээвэр, мөн ОХУ-ын халааж тавьдаг дээврийн хуйлмал материал, ус зайлуулах систем зэрэг нэлээд олон төрлийн дээврийн материалуудыг мөн танилцуулж байна.

“AK&T” ХХК-нийн борлуулалтын менежер П.Ганхөлөг:



Энэ жилийн хувьд “Барилга Орон Сууц 2015” үзэсгэлэн яармагт олон хүн ирж, худалдан авагчдын эрэлт тодорхой хэмжээгээр сэргэжээ. Зохион байгуулагчийн зүгээс үзэсгэлэнгийн зар сурталчилгааг маш идэвхтэй түгээж, сайн ажилласан нь харагдаж байна. Оролцогч байгууллагууд ч мөн цөөнгүй. Ялангуяа орон сууцны төсөл хэрэгжүүлэгч компаниуд бүр олноороо оролцож байгаа нь маш сайшаалтай зүйл.

Энэхүү үзэсгэлэн нь иргэд болон борлуулагчдыг холбож, худалдан авах боломжийг бүрдүүлж чадсан. Манай компани нь Тайваний зуун хувийн хөрөнгө оруулалттай. Өнгөрсөн хугацаанд бид “Аман Хуур 1” хотхоныг ашиглалтанд оруулсан. Одоо Аман Хуур 2” төсөл маань хэрэгжиж байна.

Улс эх орныхоо хувь нэмэрт бага ч болов хувь нэмэр оруулах үүднээс бид 4 төрлийн эко технологийг онцлох буюу брэнд болгож байгаа.