“Барилга Орон Сууц 2015” үзэсгэлэн яармаг амралтын өдрүүдэд Мишээл Экспо төвд үргэлжилж байна. Үзэсгэлэнд шинэ орон сууцны 80 гаруй төсөл, хотхоныг танилцуулж байгаа билээ. Жил бүр уламжлал болон зохион байгуулагддаг уг үзэсгэлэнд орон сууц сонирхогчид олноор ирж буй нь оролцогч байгууллагуудын хувьд тун завшаантай хэрэг болж байна.

     Учир нь засгийн газраас иргэдийг орон сууцжуулах хөтөлбөр, гэр хорооллын дахин төлөвлөлтийн ажлыг эхлүүлж, ипотекийн зээлийн урьдчилгааг 10 хувь болгон бууруулах шийдвэр гаргасан. Эдгээр хүчин зүйлтэй холбоотойгоор идэвхи нь сулраад байсан орон сууц сонирхогчдын эрэлт дахин сэргэх хандлагатай болсныг салбарын мэргэжилтнүүд үзэсгэлэнгийн нээлтийн ажиллагаан дээр онцолж байсан. Түүнчлэн жил болгоны намар 9-р сарын үед хөдөө орон нутгаас иргэд хот руу ихээр орж ирдэг нь орон сууцны эрэлтэд тодорхой хэмжээгээр нөлөөлдөг болохыг дурдсан.



     Үзэсгэлэнд ирсэн иргэдийн ихэнх нь орон сууцны үнэ ханшийг хамгийн ихээр сонирхож байгаа. Тэдний хувьд орон сууцны үнэ, байршил, төлбөрийн нөхцөл, зээлээр авах боломж зэргийг юун түрүүнд сонирхож байгаа юм.

     “Барилга Орон Сууц 2015” үзэсгэлэнд оролцогчдын танилцуулж буй шинэ орон сууцнуудын ам метр нь 1,250,000-5,500,000 төгрөг хүртэлх үнэтэй байна. Үнийн ялгааны гол хүчин зүйл нь мэдээж байршил, зэрэглэл байх аж. Хотын захын бүст байрлах орон сууц 1,2-2,8 сая, харин хотын төв орчимд байрлалтай орон сууц 1,9-5.5 сая төгрөгийн үнэтэй байна.



     Төсөл хэрэгжүүлэгч компаниудын зүгээс олон янзын урамшуулал, төлбөрийн уян хатан нөхцөл, хонжворт сугалаанд оролцох эрх гээд олон янзын сюрпризийг барьж байгаа юм. Мөн орон сууц захиалагчиддаа гал тогооны тавилга, иж бүрэн тавилга, гэр ахуйн цахилгаан хэрэгсэл болон цахилгаан барааны дэлгүүрт үйлчлүүлэх эрх зэрэг олон төрлийн бэлэг дагалдуулан өгөх ажээ. Зөвхөн үзэсгэлэнгийн өдрүүдэд урамшуулалт захиалга явуулж байгаа компаниуд ч цөөнгүй байна.



     Үзэсгэлэн яармагт “Tuul Condominium”, “Энхжин”, “Саруул хороолол”, “Дүнжингарав Чухаг”, “Ивээл”, “Сувдан Сондор”, “Орчлон”, “Buyant Ukhaa Villa”, “Victoria Town”, “Хийморь 13”, “Happy Town”, “Цагаан Хуаран 1”, “Toscana”, “Naran Place”, “Аман Хуур 2”, “Дэлгэрэх”, “Elizabeth”, “Сэлбэ 96”, “Эрчим Өргөө 21”, “Аригбүрд”, “Наран Амгалан”, “Эрдэнийн Хотхон 108”, “Mytown”, “Homegrand” зэрэг шинэ төслүүд орон сууцны хямдрал урамшуулалтай худалдаа явуулж байгаа тул та бүхэн яараарай.

     “Барилга Орон Сууц 2015” үзэсгэлэн 8-р сарын 23-ны өдрийг дуустал үргэлжилнэ.