Сүүлийн өдрүүдэд иргэдийн шүүмжлэлд ихээхэн өртөөд байсан Арслантай гүүрэнд хийсэн усан байгууламжтай холбоотой асуудалд Улаанбаатар хотын ерөнхий менежер Б.Бадрал тайлбар хийсэн байна.

Тус усан байгууламж нь Арслантай нүүр орчимд иргэдийн амрах, тухлах орчныг бүрдүүлэх зорилгоор төлөвлөсөн бичил цэцэрлэгт хүрээлэнгийн нэгээхэн хэсэг аж. Дүүргүүдийн Засаг Даргын Тамгын Газрын ажил хариуцсан мэргэжилтнүүд болон усан оргилуурын засвар үйлчилгээг хариуцдаг байгууллагуудын удирдлага, инженерүүдийн дунд усан оргилуурын ашиглалтын сайжруулах талаар сургалт зохион байгуулжээ.

Нийслэл хотын нутаг дэвсгэрт хийж байгаа усан оргилууруудтай танилцах ажлын хүрээнд дэлхийн хотуудад сүүлийн үед нэвтэрч байгаа усан оргилуурын нэг төрөл болох усан хөшгийг ажиллуулж, тэр нь Арслантай гүүрний орчимд бичил орчныг бий болгох ажлын нэг хэсэг болохыг Улаанбаатар хотын Захирагчийн Ажлын Албанаас мэдэгдсэн юм. Энэ нь Монголд анх удаа хөрсний усны нөөцийг ашиглан, усны зардал гаргахгүй ажиллах давуу талтай байгууламж бөгөөд Монгол инженерүүдийн бүтээсэн ажил хэмээн Ерөнхий менежер онцолсон байна.

Энэхүү тохижилтын ажилд нийт 70.18 сая төгрөг зарцуулахаас зураг төсөл, судалгаанд 4 сая, гадна цахилгааны ажилд 5.5 сая, гадна гэрэлтүүлгийн ажилд 6.0 сая, газар шороо, тохижилт сэргээн засварлах ажилд 13.6 сая, усан хөшигний байгууламжид 22.1 сая, нэмэлт зардалд 10.8 сая, захиалагчийн хяналт, магадлашгүй ажлын зардалд 2.3, НӨАТ-т 5.8 сая төгрөгийг тус тус зарцуулжээ.

Усан хөшигний цахилгаан хангамжийн асуудлыг шийдэхийн тулд авто зам доогуур 1,5м гүн, 16м урт нүх ухаж цахилгаан дамжуулах хоолой байрлуулсан аж. Мөн хоолойгоор дамжин гарах усыг шүүж, цэвэршүүлэх шүүлтүүр байршуулжээ. Уг усан байгууламжийг сайжруулах техник угсралтын ажил үргэлжилж байгаа бөгөөд эвдэрч гэмтсэн зүйл одоогоор байхгүй гэж албаны хүмүүс мэдэгдлээ.