Ерөнхийлөгч Ц.Элбэгдорж бидний хэрэглэж заншсан гадаад  үгсээс нэгийг боловч халж, цементийг “гахиур” хэмээн нэрлэх тухай уриалснаас хойш цементийн үйлдвэрлэгчид энэхүү үгийг ашиглахаар шийдсэн бололтой.
Барилгын материал үйлдвэрлэлийн томоохон төлөөлөгч Хөтөлийн цемент, шохойн үйлдвэр энэ жилээс савласан цементийнхээ уутан дээрээ “Монгол гахиур” хэмээн бичих болжээ.
    Тус компани нь хуурай аргын цемент үйлдвэрлэх болсноос хойш бүтээгдэхүүний савалгаанд анхаарч байгаа бөгөөд өнгөрсөн сард болсон цементийн сав баглаа боодлын стандартыг шинэчлэх санал асуулга уулзалтын үеэр шинэхэн уутаа танилцуулж  байсан. Тэрхүү санал асуулгад оролцсон холбогдох байгууллагын мэргэжилтнүүд Хөтөлийн цементийн үйлдвэр нь Монголын тэргүүлэгч, томоохон компани хэр нь өөрийн бүтээгдэхүүний сав баглаа боодолд төрлөх хэлээрээ бичиж, тэмдэглээгүй талаар шүүмжилж байсан билээ. Тэд энэхүү дутагдалаа тэр даруй засч, ийнхүү бүтээгдэхүүнийхээ уутан дээр Монгол гахиур хэмээн бичжээ.
   Мөн үндэсний цементийн үйлдвэрлэгчдийн нэг болохоор барилга угсралтаа эхлүүлээд байгаа өөр нэгэн компани “Гермес гахиур” хэмээх нэрийг сонгожээ.
Гахиур хэмээх нэр харин барилгынханд хэр “ойрхон” санагдах бол..