Дэлхийн хамгийн анхны нарны эрчим хүчээр ажилладаг дулаан хадгалах хосломол систем бүхий нэгэн сууцыг танилцуулж байна.
       Тус бүтээл нь эрчим хүчний хэмнэлттэй, хичээлийн зөөврийн танхимын дизайныг  боловсронгуй болгох,  оюутан, багш нарын хувьд оновчтой сургалтын орчинг бүрдүүлэх зорилгоор 2014 оны гуравдугаар сард АНУ-ын Сан-Антонио хотод зохион байгуулсан "Дэлхийн модуль" бага хурлын үеэр Ногоон барилгын ангилалд шагнал хүртсэн байна. Шагналын эзэд нь Blazer Industries болон  архитектор Андерсон Андерсон нар юм. Тухайн барилга нь дулаан, тав тухтай орчин, гэр доторх агаарын чанар, нарны гэрэлтүүлэг, дуу авианы тархалт, эрчим хүчний үр ашиг, архитектурын шилдэг шийдэл, эдийн засгийн хэмнэлт зэрэг шалгуурыг хангаж байж Ногоон барилгын ангилалд багтдаг байна.
      Барилгын хог хаягдлыг багасгах,  өртөг зардал хэмнэх, эрчим хүчний үр ашгийг дээшлүүлэх, цаашид нүүлгэж шилжүүлэх,  дахин ашиглахад хялбар байх зэргийг  тооцоолж дулааны тусгалыг  шингээх болон хортон шавьж үүрлэх боломжгүй, хөгц үүсдэггүй ган хүрээ, сэндвич хавтан зэрэг материалыг сонгон хэрэглэсэн. Сууцны доторлогоо болон шаланд олон улсын FSC гэрчилгээгээр баталгаажсан VOC материал ашиглаж, байгалийн модоор өнгөлжээ. 
       Нарны зайн хавтангууд бүхий хөрөөний ир хэлбэрийн өвөрмөц дээвэр,  агааржуулалтын төхөөрөмж, байгалийн гэрлийг оновчтой хуваарилж дотогш нэвтрүүлэх цонхнууд, доороосоо халдаг шал зэрэг нь энэхүү 960 метр квадрат зөөврийн сууцны гайхалтай давуу тал болох юм. Түүнчлэн автоматаар унтарч асдаг гэрэлтүүлэг нь эрчим хүчийг хэмнэхэд хувь нэмрээ оруулах болно. Дээвэр дээрх хавтангууд нарны эрчим хүчийг хуримтлуулдаг бол бүх цонх нь өрөөний цэвэр агаарыг нэмэгдүүлэх ажиллагаатай. Барилгын бүх систем нь дээврийн усыг хурааж хадгалах тохируулгатай бөгөөд энэ нь байгаль дээрх цэвэр усны нөөцийг хамгаалахад чухал ач холбогдолтой юм.
        Гучин жилийн турш хийсээр ирсэн судалгаа шинжилгээний үр дүнд эрчим хүч ихээр ашигладаг уламжлалт  сууцнаас олон зүйлээр давуу талтай энэхүү загварыг зохион бүтээсэн байна. Барилгын дээвэр дээр суурилуулсан нарны хавтангууд жилд  13,727 кВт  цахилгаан үйлдвэрлэдэг бөгөөд (барилгын ашиглалтын 180% -400%) илүүдэл эрчим хүчийг  зэргэлдээ сургуулийн байшин хэрэглэдэг. "Үйлдвэрлэл, тээвэрлэлт, угсарч суурилуулах гээд бүхий л үйл явц болон материалын хувьд ч  байгаль орчинд хор нөлөөгүй, хамгийн эрүүл орчинг бүрдүүлсэн байгальд ээлтэй, эрчим хүчний хэмнэлттэй бүтээл болсон талаар уран барилгачид бичиж байна. Түүнчлэн "Байгалийн нөөц баялгийг хамгаалах, үйлдвэрлэлийн болон засвар үйлчилгээний зардлыг багасгах төдийгүй тав тухтай, эрүүл орчинд амьдрах  боломжийг олгох болно” гэжээ.