Барилга, хот байгуулалтын яамнаас барилгын салбар эрх зүйн үндсэн баримт бичиг болох Барилгын тухай хуулийн шинэчилсэн найруулгыг УИХ-аар батлуулахаар эртнээс хөөцөлдөж байгаа ч Шийдлийн гэгдэх одоогийн Засгийн газрын үед нэлээд идэвхтэй яригдаж байгаа юм. Долоо хоногийн өмнө Засгийн газрын хуралдаанаар Барилын тухай хуулийн шинэчилсэн найруулгыг УИХ-аар хэлэлцүүлэхээр шийдсэн бол Монгол Улсын Их Хурлын дарга Зандаахүүгийн Энхболдод Засгийн газрын гишүүн, Барилга, хот байгуулалтын сайд Д.Цогтбаатар өнөөдөр /2015.07.09/ Барилгын тухай хуулийн шинэчилсэн найруулгын төслийг өргөн барьсан байна.
Барилгын тухай хуулийг 1998 онд анх батлуулж, 2008 онд шинэчилсэн найруулгыг хийж, одоо дахин шинэчлэх гэж байгаа нь энэ юм.
      БХБ-ын сайд Д.Цогтбаатар Төрийн үйлчилгээг барилгын салбарт шуурхай болгох зорилгоор барилгын ажлын зөвшөөрөл олгох процессыг уг хуулийн төсөлд нарийвчлан зохицуулсан төдийгүй тодорхой хугацаа тогтоож өгсөн. Барилгын ажил эхлүүлэх, үргэлжлүүлэх зөвшөөрөл олгох, хяналт тавих, барилга байгууламжийг ашиглалтад хүлээн авах үйл ажиллагааг аймаг, нийслэлийн Засаг даргын бүрэн эрхэд тусган гүйцэтгэхээр тусгасан. Мөн барилгын үйл ажиллагааны мэргэжлийн оролцогчдын эрх үүргийг тогтоох, даатгалд хамруулах, барилгын салбарын мэргэжилтнийг бүртгэж гэрчилгээ олгох, барилгын компанийг бүртгэх, барилгын хууль тогтоомж зөрчигчдөд хариуцлага тооцох харилцааг зохицуулах зорилгоор Барилгын тухай хуулийн шинэчилсэн найруулгын төслийг боловсруулсан болохыг УИХ-ын даргад танилцуулсан байна.