Сүүлийн үед барилгын салбарт хавтгай дээврийн технолгийг түлхүү ашиглах болсонтой холбогдуулан хавтгай дээврийн хэд хэдэн шийдлийг танилцуулж байна. Барилгын салбарт 1990-ээд оны сүүл хүртэл хавтгай дээврийг хуйлмал материалаар хучихад хятад болон оросод үйлдвэрлэсэн хар цаасанд лак түрхэж наадаг байсан. Энэ нь манайх шиг эрс тэс уур амьсгалтай оронд хэдхэн жил болоод л хагарч, хөндийрч цоорох, хорчийн агшиж, ус тусгаарлах шинж чанараа алддаг сул талтай. Харин сүүлийн жилүүдэд халааж наадаг олон янзын зориулалттай ус чийг тусгаарлах чанар сайтай материалүүд орж ирсэн. Эдгээр материалаас хамгийн өргөн хэрэглэгддэг нь битум рулонон хар цаасууд юм. Бүтээгдэхүүний доод гадарга нь амархан хайлдаг полимер хальсаар, гаднах өнгөн тал нь чулуун бүрхүүлтэй үйлдвэрлэгдсэн. Үндсэн суурь материал нь үл ялзрах органик нийлэг эд байдаг. Харин чулуугүй цаасыг бусад төрлийн дээврийн материалын доор суурь болон уур ус тусгаарлагчаар ашиглаж болох бөгөөд ингэснээр дээврийг ус чийгнээс улам бат хамгаалах мөн дуу чимээг зохих хэмжээгээр намсгаж өгдөг байна. Чулуутай цаасаар гадна давхаргад наах нь нар салхины нөлөө, цас бороо, механик гэмтлээс  хамгаалах үе болдог. Эдгээр материал нь шинээр хийж буй болон дахин засварлаж буй дээврийн аль алинд сайн тохирно. Хучилт хийхээс өмнө дээврийн бетон гадаргууг ус чийг тусгаарлагчаар тэгшхэн өнгөлж бэлтгэсэн байх эсвэл элс цементэн өнгөлгөө хийж өгсөн байх шаардлагатай гэнэ. Хавтгай  дээврийг хуйлмал битум рулонон материалаар хийх тохиолдолд  дэвсгэр гадарга нь  маш тэгшхэн хуурай байлгах хэрэгтэй ажээ.
Хэрэглэгчдийн таашаалд нийцсэн буй хавтгай дээврийн өөр нэг шийдэл нь АНУ-ын Firestone Building Products компаний ЭПДМ (этилен- пропилин -  дайн-терполимер мембран) суурьтай 1 үет дээврийн хуйлмал резинэн материал юм. Албан ёсны борлуулагч “Фужи-Алтай” ХХК-ийг ч барилгын салбарынхан, хэрэглэгчид анхдахгүй. Firestone Building Products –ийн энэхүү технологи нь 1900-аад оны үеэс барилгад ашиглагдаж эхлэсэн бөгөөд ЭПДМ нь тус компанийн мэргэжилтнүүд, эрдэм шинжилгээний ажилтнуудын шинжилгээ судалгааны ажлын үр дүнд бий болгосон өндөр чанартай бүтээгдэхүүн гэдэг. Битум болон чулуутай, чулуугүй хар цаасан дээврийн дараагийн үе гэж нэрлэгддэг энэхүү технологи давуу тал олонтой болох талаар мэргэжилтнүүд дурддаг.
Манайд нэвтрүүлж буй дээврийн энэхүү системд голдуу 3,05 - аас 6,1 м өргөнтэй хуйлмал, резинэн материалыг ашиглах бөгөөд дээш гарсан хийцлэлүүд, хашлага хананд зориулалтын Bonding Adhesive буюу тусгай цавуугаар наана. Резинэн хучилтуудыг 100 мм – ээс  120 мм –ээр зөрүүлэн залгаж наах бөгөөд зориулалтын хурдан наагч Splice Tape туузыг хавчуулан наана.  Ингэснээр цул нэгдмэл, ус тусгаарлалтын давхарга үүснэ. Уулзвар, залгаасуудыг зохих ёсоор битүүмжилж, нөхөөс хийсний дараа дээврийн периметрийн дагуу ус тусгаарлалтыг ЭПДМ мембранаар бүрэх ба дээврээс гарсан инженер, техникийн хоолой, яндан, барилгын хийцүүдийг Firestone Building Products компанийн техникийн шаардлагын дагуу гүйцэтгэнэ.
Дээврийн болон ус тусгаарлалтын ажилд уг технологи бүхий дурдсан бүтээгдэхүүнийг ашигласнаар галын аюул учрахгүй, өндөр үнэтэй багаж, тоног төхөөрөмж  ашиглах шаардлагагүй, мөн цаг уурын нөхцөлөөс хамаарах дутагдалтай тал бага байдгаараа давуу талтай гэнэ.

1 боодол нь 270 м² хүртэлх талбайг бүрэхүйц хэмжээгээр үйлдвэрлэгддэг тул уулзвар, залгаас, зөрүүлгийн тоог ихээхэн багасгах бөгөөд дээврийн уг чанар, найдвартай байдлыг улам батжуулах ба барьцалдан наалдах өндөр чанартай Bonding Adhesive цавууг гадаргууд ашигласнаар салхины үйлчлэлд тэсвэртэй дээврийн цогц систем бий болдог.
“Фужи-Алтай” компани энэхүү ЭПДМ мембранаар дээврийн ажил хийхээс гадна  суурийн ус тусгаарлалт, авто зогсоол, гараашийн ус тусгаарлалтын ажлыг гүйцэтгэдэг. “Firestone Building Products” –ийн зах зээлд нийлүүлж буй мембран, бусад дагалдах бараа материалын чанарт 10 жилийн баталгаа олгодог байна. ЭПДМ мембранаар дээвэр болон ус тусгаарлалтын ажлыг хүйтэн, сэрүүний улиралд ч гүйцэтгэх боломжтойгоос барилга угсралтын ажил хийх хугацааг уртасгадаг. ЭПДМ мембраныг дээвэрт ашигласнаар байгаль орчинд ээлтэй, ногоон орчинг үүсгэсэн, тав тухтай, аглаг ойд амьдарч буй мэт боломж олгох гайхалтай шийдэл, орчинг бий болгоно. Нэн ялангуяа, сүүлийн үед эрчимтэй хөгжиж буй тохилог, хувийн орон сууц, хотоос зайдуу босож буй хаус хорооллуудад баригдаж буй 1-3 давхар барилгуудын дээврийг шувуун оройтой, мансардтай байдлаар биш  хавтгай дээвэртэй байхаар шийдэн ус тусгаарлалтыг ЭПДМ мембранаар гүйцэтгэсэнээр байгаль орчинд ээлтэй, эрүүл мэндэд хэрэгтэй бүхэл ногоон орчинг бий болгох боломжыг бүрдүүлж чадах юм. Хавтгай дээвэр дээрээ зүлэг, ногоо, бут, сөөг тарих, амралтын задгай өрөө, усан бассейн, цэцэрлэгт хүрээлэн, ресторан, кафе, наран шарлагын талбай гээд юу дуртайгаа бүрдүүлж болно. Эсвэл Монгол гэрээ барьчихна.

Дараагийн танилцуулах дээврийн бас нэгэн шийдэл бол солонгос технологийн резинин будгийн шийдэл юм. Ус үл нэвтрүүлэх, дулаан хадгалах чадвар сайтай резинин будгийн шийдэл нь ямарч завсар зүйдэлгүй, цул цутгамал учир ЭПДМ мембран дээврийн нэгэн адил дээвэр дээрээ ногоон байгууламж, болоод хүүхдийн тоглоомын талбай, амрах хэсэг болгон ашиглахад нэн тохиромжтой гэнэ. Энэ технологийг ашигласан шал болоод сагсан бөмбөгийн талбай сүүлийн үед олноор ашиглалтанд орж байгаа билээ. Эдгээр нь технологийн хувьд ижил ч будгийн зориулалт нь өөр байдаг байна. Олон улсын ISO9001 сертификат бүхий энэ технологийг манай хэрэглэгчид дээвэр будах төдий ажлыг өөрөө хийж чадна хэмээн  хөрөнгө, цаг хугацаагаар хохирол тохиолдол багагүй гарчээ. Ийм учраас эрхэм уншигч та бүхэн энэ нь өөрт тохирсон стандарт бүхий нарийн технологи тул цаашид ашиглах хугацаа, чанарын баталгаатай байх зэргийг бодолцон заавал мэргэжлийн хүмүүст хандаарай. Ийм төрлийн үйл ажиллагаа явуулж буй хэд хэдэн компани Монголд байдаг. Бидэнд хандан мэдээллээ ирүүлсэн “Корео Пансуу” компани ажлын хөлс болоод НӨРТ-ыг оруулаад м/кв-ийг нь 58,000 төгрөгөөр хийж гүйцэтгэж байна.