Нийслэлийн авто замын түгжрэлийг сааруулах үүднээс Улаанбаатар хотын техникийн захуудыг нэгтгэн СХД-ийн 32- дугаар хороо хуучнаар 22-ын товчооноос 1,7 зайд 130 га газарт Авто худалдааны нэгдсэн цогцолборын ажил эхлээд багагүй хугацаа өнгөрлөө.

Ажлын явцын талаар Авто худалдааны цогцолборын маркетингийн менежер О.Цэлмэгээс тодрууллаа.

“Авто Худалдааны Цогцолбор”-ын эхний ээлж болох нийт 6375 авто зогсоол бүхий 30 га цогцолборыг бүтээн байгуулах ажил амжилттай явагдаж байна. Зогсоолын барилгын ажил 100% гүйцэтгэлтэй хийгдсэн бөгөөд талбайн гэрэлтүүлэг, зогсоол дээрх тэмдэг, тэмдэглэгээ, цагаан шугам, дугаарлалтын ажил бүрэн дуусч, 06 сарын 25-ны өдөр Улсын Комисст хүлээлгэн өгсөн байна. Улсын комиссын дүгнэлт гармагц, авто зогсоол худалдан авсан иргэд, бизнес эрхлэгчид зогсоолын үл хөдлөх хөрөнгийн гэрчилгээгээ гардан авч, эдийн засгийн эргэлтэд оруулах бүрэн боломжтой болох юм.   

Одоогийн байдлаар цогцолборын дотоод замын ажил эхэлсэн байгаа бөгөөд хуучин 22-ын товчоо орчмоос “Авто Худалдааны Цогцолбор” руу холбогдсон 30 метрийн өргөнтэй, 1.5 км урттай авто замыг барьж байгуулах ажлын гүйцэтгэгчийг шалгаруулах тендер явагдаж дуусаад, шалгарсан гүйцэтгэгч ажилдаа ороход бэлэн болоод байна. Авто замыг барьж байгуулах газар орчмын айл өрх, албан байгууллагуудын эзэмшлийн газрыг чөлөөлүүлэх ажлыг СХД-ийн өмчийн харилцааны хэлтсээс гүйцэтгэнэ.

“Авто Худалдааны Цогцолбор”-т цайны газар 22, нийтийн бие засах газар 5, авто угаалгын газар 4, авто засварын газар 2, нотариат 1, даатгалын байгууллага 3, арилжааны банк 2 байхаар төлөвлөж, зөөврийн барилгуудыг цогцолборын талбайд байрлуулсан. Түүнчлэн авто тээврийн хэрэгсэл худалдах, худалдан авах үед үүсэх бүх төрлийн харилцааг зохицуулдаг төрийн болон хувийн хэвшлийн байгууллагуудын салбар нэгжүүд байршин ажиллахаар төлөвлөөд байна.