Ийм асуулт асууж манай редакцид хандах нь бий. Бид эрхэм уншич та бүхний асуултанд өөрсдийн боломж бололцооны хэрээр  хариулах бөгөөд ийм ч учраас “Барилга.МН” сэтгүүлд “Асуувал хариулъя” хэмээх буланг тусгайлан бэлтгэн хүргэж байгаа билээ. Доорх эхээс барилгын дүүжин өргүүрийн магадлагааг хэрхэн хийлгэх талаар мэдэх болно.
Барилгын дүүжин өргүүрийн магадлалыг тухайн  мэргэжлийн аль ч байгууллагад хандаж хийлгэж болох бөгөөд магадлагаа гаргах зах зээлийн дундаж үнэ ханш 50 мянга орчим төгрөг байдаг гэнэ. Ихэнх хэрэглэгчид “Өргөх машин механизмын мэргэжлийн холбоо” ТББ-д хандаж хийлгэдэг байна. Магадлагаа хийлгэхийн өмнө урьдчилан бүрдүүлэх бичиг баримт, бэлдэх зүйлс байх бөгөөд энэ тухай “Өргүүрийг төхөөрөмжлөх, аюулгүй ашиглах дүрэм”-д тодорхой тусгасан байдаг.  Харин  энэхүү дүрмийг Барилгын хөгжлийн төвд найман мянган төгрөгөөр зарж борлуулдаг. Уншигч танд тус болох үүднээс  бүрдүүлэх зүйлсийг товч танилцуулбал: Юуны өмнө магадлал хийлгэх дүүжин өргүүрээ паспортжуулсан байх шаардлагатай. Мөн түүнийг ажиллуулах мэргэжилтэн болон бүрэн бүтэн байдлыг хариуцаж ажиллах ажилтны мэргэжлийн үнэмлэх, энэ ажлыг хариуцаж ажиллахыг үүрэг болгосон захирлын тушаалыг заавал бүрдүүлнэ. Түүнчлэн тухайн магадлал хийлгэх дүүжин өргүүрийн даацаас 2 дахин их ачаа бэлдсэн байх шаардлагатай бөгөөд энэ нь ажиллагаа хэвийн эсэхийг ачаа өргөж, ажиллууж үздэг учраас тэр юм. Тухайлбал магадал авахыг хүссэн дүүжин өргүүрийн даацын хэмжээ 500кг бол 1000кг буюу 1тн ачаа бэлдэх шаардлагатай болж байна.