2020 оны олимпийн наадам Японы Токио хотод зохион байгуулагдана. Олимпийн наадмыг зохион байгуулах эрхийн төлөөх өрсөлдөөнд эцсийн шатанд тунаж үлдсэн гурван хотоос Токиог сонгох болсон гол шалтгаан нь олимпийн төсөв болоод 2011 оны байгалийн гамшиг юм. Стамбул хот олимпийн наадам зохион байгуулахад 19 тэрбум ам.доллар зарцуулах урьдчилсан тооцоо гаргасан бол Токиогийнх 5-6 тэрбумд багтаж буй. Токио хотын удирдлагууд одоогоор олимпийн бэлтгэл ажилд зориулж 4,9 тэрбум ам.доллар цуглуулаад байгаа аж. Түүнчлэн олимпийн наадамд зориулж шинэ цэнгэлдэх хүрээлэн барихаар болсон бөгөөд үүний төсөв нь зохион байгуулалтын нийт зардлаас тусдаа гэнэ.    
      Цэнгэлдэх хүрээлэнгийн загварыг Британийн архитектор Заха Хадид гаргасан байна. Алдарт архитекторийн  ультрамодерн загвараар хийхээр зураг төсвийг нь батлаад байсан цэнгэлдэх хүрээлэнгийн  зардал төсөв нь жил ирэх тусам нэмэгдээд байгаа учир Японы Засгийн газар өндөр өртөгтэй загвараас татгалзахаар шийджээ. Унадаг дугуйн хамгаалалтын малгай шиг хэлбэр дүрстэй энэхүү загвараар 290,000 квм талбайтай 80,000 хүний багтаамжтай цэнгэлдэх хүрээлэнг барина гэвэл 250 тэрбум иен буюу 2,02 тэрбум ам.доллар шаардлагатай аж. Тиймээс Шинзо Абегийн Засгийн газар аль болох түргэн хугацаанд шинэ цэнгэлдэх хүрээлэнгийн загвар гаргахаар шийдвэрлэж, аль болох зардал төсөв багатай загвараар цэнгэлдэх хүрээлэнгээ хийхээр төлөвлөж байна.
      Заха Хадидын гаргасан загвар гоёмсог, орчин үеийн гайхалтай байгууламж хэдий ч хэт өндөр өртгөөсөө болж олон нийтийн шүүмжлэлийг ихээхэн хүлээж байсан. Харин нэрт архитекторч цэнгэлдэх хүрээлэн барих төсөв зардал зөвхөн загвараас шалтгаалаагүй, Японд барилга барих өртөг, материалын үнэ жил ирэх тусам нэмэгдэж байгаатай холбоотой хэмээн мэдэгджээ.
       Ийнхүү цэнгэлдэх хүрээлэнгийн загварыг өөрчилснөөр төлөвлөсөн ёсоор 2019 онд ашиглалтад орж чадахааргүй болж байна. Цэнгэлдэх хүрээлэнг товлосон хугацаандаа ашиглалтад оруулснаар 2019 оны Регбигийн дэлхийн аварга шалгаруулах тэмцээн зохион байгуулахаар төлөвлөөд байсан юм. Гэвч нэгэнт цэнгэлдэх хүрээлэнг барьж амжихааргүй болсон учир яаралтай өөр арга хэмжээ авахыг Дэлхийн регбигийн холбоо Японы талаас шаардсан байна.  
       Японы алдартай архитекторууд Заха Хадидын загварыг өндөр өртөгтэйгээс гадна хэлбэр хийцийн хувьд тохиромжгүй хэмээн шүүмжилсээр байсан юм. Тухайлбал, 1964 оны олимпийн цэнгэлдэхийн загварыг гаргасан Фумихико Маки “Би цэнгэлдэхийн дээврийн загварыг эсэргүүцэж байгаа. Ийм ташуу, хазгай дээвэр барина гэдэг нь миний санаанд буухгүй байна. Техникийн талаас ийм дээвэр барихад хэцүү бас өндөр өртгөөр босно. Хэрэв задгай цэнгэлдэх байгуулбал дараа нь талбайн хэмжээг багасгаж болно. Харин битүү дээвэртэй барьсан тохиолдолд ингэх боломжгүй” хэмээжээ. Мөн олон нийтийн зүгээс цэнгэлдэх хүрээлэнгийн загварыг 00-ийн суултуур шиг хэлбэртэй гэж дургүйцэж байгаа аж.