Швейцарийн Волс хэмээх үзэсгэлэнт уулын хөндийд тэнгэр баганадсан гоёмсог нэгэн цамхаг сүндэрлүүлэхээр төлөвлөж байна.
      АНУ-ын уран барилгын “Морпосис архитектор” студи 381 метр өндөр шилэн цамхгийн төслийг боловсруулжээ. Энэ нь “Морпосис архитектор” студийн  Швейцарьт хэрэгжүүлж буй анхны төсөл юм. Шуудангийн хаягаар “7132 цамхаг” хэмээн нэрлэгдсэн тус байгууламж нь дэлхийн хамгийн өндөр зочид буудал болох бөгөөд 2019  онд ашиглалтад орох гэнэ. Тус байгууламжийн гадна хана бүхэлдээ шилээр хийгдэх учир “Хэт нимгэн, ил тод” гэж тодорхойлж болно.
       "7132 цамхаг" нь гайхалтай засал чимэглэл, дизайнтай байхаас гадна барилгын дотроос байгалийн сайхныг тольдох боломжийг зочдод олгож байгаагаараа онцлог юм. Цамхгийн гадна талбайд хангалттай ногоон орчныг бүрдүүлэх бөгөөд мөнх ногоон моддоор хүрээлэгдсэн тансаг зэрэглэлийн зочид буудал байгуулахөөр төлөвлөж байна.  
Зочид буудал нийт 107 өрөөтэй байх ба дээд зэрэглэлийн ресторан, кафе, бар, халуун рашааны газар, номын сан, уран зургийн үзэсгэлэн, усан сан, фитнесс зэргийг давхар төлөвлөж өгсөн. Одоогийн байдлаар зочид буудлын нэг өрөө хоногийн 675 евро байхаар тооцоолжээ. 
       Зарим шүүмжлэгчдийн зүгээс орчин тойрны байгалийг ойлгох барилгын толин хана шувуудын амьдралд сөргөөр нөлөөлнө гэж үзэж байгаа ч байгалийн үзэсгэлэнт газар ийм төрлийн тансаг байгууламж барьснаар тухайн бүс нутаг, газар нутгийн үнэ цэнийг нэмэгдүүлэх, улмаар унаган байгалийн өнгө төрх, баялгийг хамгаалах үзлийг төлөвшүүлэн дэлгэрүүлэхэд түлхэц болно гэж үзэх хүмүүс бас байгаа юм.