Коломенскийн хаант угсааны эзэмшлийн энэхүү гайхамшигт модон ордон нь Коломенскоос Каширскийн метроны зогсоол хүртэл Москва голын баруун эрэгт оршдог. Энэ нь хотын төвөөс Москвагийн захын хэсгийг харах хамгийн сайхан байрлал аж. Түүхийг эргэн сөхвөл, Коломенск ордон Монгол-Татарын дайралтаас дайжсан Коломны дүрвэгсдийн суурьшсан тосгонд байрладаг юм. Коломенск нь 1660-аад оны үед баригдсан хааны өргөө болох модон ордон юм. Энэ нь гадныхны сонирхлыг хэзээд татсаар ирсэн нэлээд өвөрмөц засал чимэглэл бүхий сүр жавхлан төгөлдөр ордон билээ. Царын эдүгээ үеийн залгамжлагчид нь тус ордонг “Дэлхийн 8 гайхамшиг”-т багтаахаар хүсэлт тавьжээ.

Зөвхөн зуны өргөө болгохоор бариулсан ч, энэ нь Цар Алексис болон түүний өв залгамжлагчдын хувьд ямагт хайртай ордон нь байсаар ирсэн юм. Энд ирээдүйн Хатан хаан Элизабет Петровна 1709 онд мэндэлж, Цар Петр залуу насаа өнгөрүүлж байсан түүхтэй. Ордон Их хатан хаан Екатеринагийн үе хүртэл оршин тогтносон байдаг. Коломенскт оршин буй энэхүү модон ордон нь архитекторын анхны төлөвлөлтөөр нь өнөө үед байгуулсан модон ордон юм. 

Цар Алексис Михайлович хаан ширээнд суух хугацаандаа Коломенск дахь бүх модон байшинг үгүй хийж, оронд нь өөрийн энэхүү өвөрмөц, үлгэрийн мэт дээвэртэй гайхамшигтай тансаг хийц бүхий модон ордныг сүндэрлүүлжээ. Энэ нь Оросын модон барилгын тэгш хэмт бус гоо зүйн илэрхийллийн тод жишээ болж, харсан бүхэн шагшин магтахгүй байхын аргагүй гайхамшигтай үзэмж төгөлдөр аж.

Коломенскийн ордон нь хоорондоо маш нарийн холбоо бүхий 250 өрөө, учир битүүлэг олон тооны хонгил, олон төрлийн элемент, сийлбэр бүхий хэв маягийг эвдсэн өвөрмөц дээвэр, салхины зүг заадаг сум, хоёр толгойтой бүргэдийн алтадмал баримлуудтай юм.