Технологийн шинэчлэл, өөрчлөлт бидний хүрээлэн буй орчин, байшин барилгын тухай ойлголтыг үндсээр нь өөрчилж байгаа онцгой цаг үе хэдийнэ иржээ. Дэлхийн инноваци, бизнесийн чадавхийн хүрээлэн болох CBRE группийн дэд ерөнхийлөгч Эли Файнгоулд өөрийн компанийн эрхлэн гаргадаг Blueprint онлайн сэтгүүлтэй зөвшилцөж, ирээдүйд хүмүүс үл хөдлөх хөрөнгийг ашиглах гурван чухал чиг хандлагыг гаргаж ирсэн байна.

Өргөн сүлжээний түгээлтээс WiFi, газар сайгүй дэлгэрсэн ухаалаг гар утаснаас хөнгөн зөөврийн компьютер хүртэл, хүчирхэг таблет төхөөрөмжүүд, технологи зэрэг хүчин зүйлс дэлхий ертөнцтэй маш нарийн нягт холбогдож байна гэж Файнгоулд үзжээ. Дэлхий дээрх олонх хүмүүс ажил гэрийн хоорондох замаар хязгаарлагдан амьдарч байгаа ч, өнөөдөр үл хөдлөх хөрөнгийн тухай хүмүүсийн бодол үндсэндээ өөрчлөгдөж байгаа юм.

“Энэхүү үйлдвэрлэлийн эрин үе нь өнөөгийн ажил ба гэрийн хоорондын ялгааг багасгаж өгч байна. Учир нь хүн хаанааас ч ажлаа хийх боломжтой тийм цаг үе ирээд байна. Ажиллах орон зай улам л олон янз болсоор байна” гэж Файнгоулд ярьлаа.

Тиймээс үл хөдлөх хөрөнгө, технологийн салбарт дүн шинжилгээ хийдэг шинийг санаачлагч, бизнес эрхлэгч тэрээр ирээдүйд хүмүүс үл хөдлөх хөрөнгийг ашиглах гурван гол чиг хандлагыг тодорхойлжээ.

Хувиршгүй уян хатан чанар

Хүн ба машины ажиллах боломж бололцоо уламжлалт орон зайн хэрэглээг үндсэнд нь өөрчилж байна. “Хэрэв хүмүүстэй ярилцан, судалгаа авахдаа, ‘Та зочны өрөө, ор, онгоц, оффис, цахилгаан шат, угаалгын өрөө гэгчлэн хаа таарсан газартаа ажлаа хийх тохиолдол гардаг уу?’ гээд асуугаад үз. Бараг бүгдээрээ л ‘Тийм’ гэж хариулна даа” гэж Файнгоулд ярьсан юм.
“Зөвхөн оффист суугаад ажил хэргээ амжуулдаг явдал үндсэндээ өөрчлөгдөж, өнөөдөр бид хаана ч ажлаа хийх боломжтой болжээ. Бусадтай нүүр тулан хамт ажилладаг нөхцөл хэзээд хоцрогдохгүй ч, компаниуд ажилтнуудаа уян хатан байлгах, ажиллах хүсэл сонирхлыг нь идэвхтэй болгох үүднээс илүү тохиромжтой үл хөдлөх хөрөнгийг эрэлхийлэх болсон” хэмээн тэрээр нэмж хэллээ.

Хамтын хэмнэлт

Сүүлийн жилүүдэд хүмүүс аливаа бараа бүтээгдэхүүн, санхүү, тээвэрлэлт, үл хөдлөх хөрөнгө гэх мэтчилэн хувааж ашиглаж болох бүхнийг хамтран хэрэглэх нь эрс нэмэгдсэн гэдгийг Файнгоулд яриандаа онцолсон юм. Дэлхийн зах зээлийн их уналтын үед компаниуд хэмнэлттэй энэхүү шийдлийг гаргаж ирсэн. Тухайлбал, “Airbnb” ба “Uber” компаниуд хүмүүст орон гэр, унах унаагаа орлогын эх үүсвэр болгох шинэ боломжийг гаргаж иржээ. Хүмүүс өөр хотуудад нүүж очихдоо, орон сууц, автомашиныг эзэмшихээс түрээслэхийг илүүд үзэх болсон байна. Үүний нэгэн адилаар олон олон хүн чөлөөт ажиллагч, гэрээт ажил гүйцэтгэгч болох гэх мэтээр бизнест хөл тавьж, “coworking space” буюу ажлын байрыг хамтран түрээслэх хэрэгцээ нэмэгдсэнээр уламжлалт оффис эзэмших нөхцлийг багасгасан гэж хэлж болно.

Тээврийн хэрэгслийн хувьсал

Жолоочгүй машин, ачааны олон үйлдэлт тээвэрлэлт, жолоочгүй онгоц зэрэг Uber-тэй адил хамтран ашиглаж болох тээврийн хэрэгслийн хэрэглээ эрс нэмэгдэж байгаа нь зорчигч болон бараа бүтээгдэхүүнийг зөөх, тээвэрлэх явцыг илүү чөлөөтэй болгож өгсөн. Файнгоулдын хэлснээр, орон зайн ашиглалтын хувьд өрсөлдөөн ихтэй зах зээл бий болж буй өнөө үед энэ нь дэд бүтцийн хэрэгцээг эрс өөрчилсөн явдал болж байгаа аж.

“Ингэснээр гудамжны зогсоолын цэгээс олон давхарт зогсоол хүртэл ашигладаг байсан хувийн автомашинтай иргэдэд зай талбайг хэмнэсэн олон боломж нээлттэй болж байна.” хэмээн Файнгоулд өгүүлсэн юм.

Хэдийгээр эдгээр чиг хандлага нь холын ирээдүйд бүрэн хэрэгжих магадлалтай ч, өнөөдөр тэдгээрийн нөлөө хэдийнээ бий болж, хүмүүс үл хөдлөх хөрөнгийг ашиглах шинэ шинэ хувилбаруудыг гаргаж ирсээр байна гэдгийг тэрээр онцолжээ.

Файнгоулд, “Хэрэв та энэ гурван шинэ чиг хандлагыг хамтад нь хэрэгжүүлбэл, уламжлалт амьдрах болон ажиллах хэв маягийг бүрэн эвдэж, үл хөдлөх хөрөнгийн өнөөгийн байдлыг үндсээр нь өөрчилнө гэсэн үг юм. Компани, байгууллагууд ажиллах хүчин байгаа тэр газарт л татагдана шүү дээ” гэлээ.