Улаанбаатар хотын үл хөдлөх хөрөнгийн зах зээлийн салбарт үйл ажиллагаа явуулж буй судалгааны байгууллагуудын орон сууцны зах зээлийн судалгааг Барилга.мн сайт албан ёсны зөвшөөрлийн дагуу сар бүр цувралаар хүргэж байгаа билээ. Энэ удаагийн судалгаагаар "Real Properties Ulaanbaatar" судалгаа, менежментийн компанийн 1 сарын байдлаар   хуучин орон сууцны үнэ ханшийн судалгааг хүргэж байна. 

УБ хотын хэмжээнд бидний бүртгэснээр хотын төвийн 6 дүүрэгт нийт 1497 орон сууц байгаагаас 1 сарын байдлаар судалгаандаа 7 дүүргийн нийт 433 орон сууцны борлуулах зарын мэдээлэл цуглуулан анализ хийж үзлээ. УБ хотын нийт орон сууцыг дүүргээр ангилж харвал /Зураг 1/ 

Хуучин орон сууцны  барилгын 52%-ийг БГД болон БЗД-ийн орон сууц эзэлж байна. БГД-ийн орон сууцны барилга 32% эзэлж байгаа нь тус дүүрэгт хамгийн их орон сууц байдаг нь харагдаж байна. Энэ хэмжээгээрээ тус хоёр дүүргээс хамгийн олон орон сууц арилжаанд ордог бөгөөд судалгааны түүвэрлэлтийн харьцааг орон сууцны тархалт болон зах зээл дэх борлуулалтын хэмжээнд тулгуурлан авсан болно /Хүснэгт 1/
Эх сурвалж: RPU

2015 оны 01 сарын байдлаар судалгааны шаардлага хангаж буй 433 хуучин орон сууцны мэдээллээс харахад
 1 өрөө байр нийт түүврийн 25% /107/
 2 өрөө байр 36% /157/
 3 өрөө байр 30% /130/
 4 өрөө байр 9% /39/-г эзэлж байна.

Харин үнийн хувьд УБ хотод 1 өрөө байр дунджаар 63,9 сая төгрөгийн үнэтэй буюу хамгийн багадаа 32 сая, хамгийн ихдээ 130 сая төгрөгний үнэтэй 1 өрөө байр зах зээлд байгаа бол ЧД, СБД, ХУД-т хамгийн өндөр үнэтэй байна.

1-4 өрөө байрны дундаж үнэ, хамгийн доод болон дээд үнийг харвал дараах байдалтай байна /Зураг 2-5/.
Мөн орон сууцны зах зээлийн нэг онцлог нь худалдан авагч, худалдагч талууд харилцан тохиролцсоны дүнд анх хэлсэн үнээс буулган арилжаалдаг онцлог байдаг тул энэхүү судалгаанд зөвхөн байр худалдаалагч талын анх хэлсэн үнийг цуглуулсныг тооцож үзнэ үү.

Дээрх графикаас харахад Сүхбаатар болон Хан –Уул дүүрэгт байр хамгийн үнэтэй байгаа бол Сонгинохайрхан дүүрэгт хамгийн хямд байна. Ингээд Улаанбатар хотын хувьд 1-4 өрөө байр ямар үнэтэй байгааг авч үзье.

1-4 өрөө байрны дундаж үнийг байршлын хувьд авч үзвэл:
Байршлыг дараах байдлаар 2 ангилсан. Үүнд:
 Хотын төв
 Хотын төв бус
Хотын төвд Баруун 4 замаас Баянбүрдийн уулзвар Сансарын аюулгүйн тойрог, Зүүн 4 замыг өнгөрөн Нарантуулын баруун урд уулзвар, Шинэ нарны гүүрний уулзвар, Баруун 4 зам гэсэн автозамаар зааглан уг тойрог дотор орших орон сууцны барилгыг хотын төв гэж үзэж, цаашид судалгаанд ашиглана. Үүнийг Дүүрэг болон хороогоор тайлбарлавал: ЧД-ийн 1-6-р хороо, СБД-ийн 1-8-р хороо, БЗД-ийн 1, 3, 6, 15, 25-р хороо тус тус багтана.
Зураг 7 : Улаанбаатар хотын 1-4 өрөө байрны дундаж үнэ, байршлаар, сая төг

1-4 өрөө байрны дундаж үнийг байршлын хувьд авч үзэхэд 1, 2, 4 өрөөний хувьд хотын төвд байрлалтай байр нь хотын төв бус хэсэгт байрлах байрнаас 7-55 саяын зөрүүтэй гарсан. Харин 3 өрөө байрны хувьд үр дүн өөр гарсан болно.
Хуучин орон сууцны барилгын хийцийг бүрэн цутгамал, карказ, тоосгон болон угсармал гэж ангилсан бөгөөд үнийн хувьд хэрхэн ялгаатай байгааг харвал:
Зураг 8 : УБ хотын 1-4 өрөө байрны дундаж үнэ, барилгын хийцээр, сая төг