Монгол Хятадын барилга, үл хөдлөх хөрөнгийн салбарын ажил хэрэгч уулзалт 2015 оны 2 сарын 10-ны БНХАУ-ын Бээжин хотод амжилттай болж, 2 орны бизнес эрхлэгчдийн харилцаа, хамтын ажиллагааг идэвхжүүллээ.

Монголын талаас Барилга хот байгуулалтын яам, Монгол улсаас БНХАУ-д дахь элчин сайдын яам, Гадаадын хөрөнгө оруулалтын газар, Нийслэлийн хөрөнгө оруулалтын газар, Гэр хорооллын хөгжлийн газар, Барилгын хөгжлийн үндэсний нэгдсэн төв, Барилгын материал үйлдвэрлэгчдийн холбоо зэрэг 38 байгууллагын 70 гаруй төлөөлөгчид, Хятадын талаас Хятадын олон улсын худалдааны танхим,  Хятадын худалдааг дэмжих нийгэмлэг болон барилга, үл хөдлөх хөрөнгийн чиглэлийн 130 гаруй байгууллагын нийт 200 гаруй төлөөлөгчид оролцсон томоохон арга хэмжээ боллоо.



          Уулзалтанд БХБ-ын дэд сайд Г.Байгалмаа, Нийслэлийн засаг даргын Хөрөнгө оруулалт хариуцсан орлогч С.Очирбат, Хөрөнгө оруулалтын газрын хэлтсийн дарга Д.Ирмүүн, БХҮНТөвийн гүйцэтгэх захирал Г.Батсүх, “Fortune property group”-ийн дэд захирал Б.Гүнболд нар Монгол улсын барилга, үл хөдлөх хөрөнгийн салбарт хэрэгжүүлж байгаа төсөл хөтөлбөр, хөрөнгө оруулалт зах зээлийн орчны талаар танилцуулсан бөгөөд 2 орны бизнес эрхлэгчдийн ажил хэрэгч уулзалт болж, бизнес эрхлэгчид уулзалдаж хамтын ажиллагаагаа өргөжүүллээ.



            Хятадын барилгын бизнес эрхлэгчид, хөрөнгө оруулагчид Монгол улсын барилга, үл хөдлөх хөрөнгийн зах зээлийн мэдээллийг ихээхэн сонирхож санхүүгийн хөрөнгө оруулалтаас гадна барилгын материал, ажиллах хүчнээр хөрөнгө оруулах, хамтран ажиллах сонирхлоо илэрхийлж байлаа.