Монгол улсын ерөнхийлөгч Ц.Элбэгдорж энэ нэгдүгээр сарын эхээр үндэсний үйлдвэрлэгчидтэй хийсэн уулзалтын үеэр нэгэн саналыг дэвшүүлэв. Энэ нь барилгын үндсэн материалын нэг цементийг гахиур хэмээн нэрлэе хэмээх санал байв. Бүүр “Үйлдвэрлэгч та бүхэн үүнийг эхлүүлэх хэрэгтэй, үүнээс хойш цемент биш гахиур шүү, бичээд ав”  хэмээн “зарлигдлаа”. Улсын Ерөнхийлөгчийг бич гэж байхад үгүй гэх хэн байхав жирийн сэтгүүлч надаас эхлээд эргэн тойронд суусан хүмүүс бүгд л тэмдэглэж авлаа. Гэвч яагаад цементийг гахиур гэж нэрлэх болсон талаар нэг ч үг хэлсэнгүй. Зүгээр л ингэж нэрлэж, нэг боловч гадаад нэрийг халж, Монгол үгсийн санг баяжуулж байгаа гэнэ.

    Ерөнхийлөгчтэй хийх уулзалтанд 300 гаруй үндэсний үйлдвэрлэгч оролцсон бөгөөд хүнс хөдөө аж ахуй, хөнгөн үйлдвэрлэл эрхлэгчдийн төлөөлж олон хүмүүс санал бодлоо хэлж, тэр бүү хэл шүүмжилж байсан ч барилгын салбарыг төлөөлж оролцогчдоос Хөтөлийн цемент шохойн үйлдвэрийн дарга үг хэлэхдээ “Манай гахиур, шохойн үйлдвэр” гэж эхлэсэн нь энэ үгийг магад зөвшөөрсний шинж биз ээ.  
Барилгын салбарынхан  Ерөнхийлөгчөөс цементийг яагаад гахиур гэж нэрлэх болсныг сонирхоогүй болохоор угийн хэрэгт дуртай, муу нэртэй хэдэн сэтгүүлчид л бие биеэс асууж, Монгол хэлний үгсийн санд ийм үг байдаг, үгийн үндэс юу болох талаар шивнэлдэж суув.