Эдийн засаг хямарч хүн  бүрийн орлогын эх үүсвэр хумигдаж буй өнөө үед банкинд өр зээлгүй иргэн гэж бараг үгүй.  Иргэдийн хамгийн их сонирхдог зээлийн хэлбэр бол орон сууцны зээл юм. 

Энэ онд орон сууц шинээр худалдан авахыг хүссэн иргэдээс 1.65 их наяд төгрөгийн ипотекийн зээлийн өргөдөл банкуудад ирснээс 28984 иргэнд 1627.7 тэрбум төгрөгийн орон сууцны ипотекийн зээл шинээр олгохоор шийдвэрлэсэн.  

Гэвч банкууд зээлээ хязгаарлаж иргэдэд тавих шаардлага өндөрсөж хүссэн хүн бүр орон сууцны зээлд хамрагдахад хэцүү болж байна.  Ипотекийн зээл үргэлжилдгээрээ үргэлжилнэ, харин энэ хязгаарлалт нь эдийн засгийн одоогийн нөхцөл байдал, ирээдүйд учирч болох эрсдэлийг тооцсон шийдвэр гэсэн хариултыг банкууд өгсөөр.  Найман хувийн зээл эхлэхээс өмнө банкуудын орон сууцны зээлийн жилийн дундаж хүү 18-20 хувь байв. Хоёр оронтой тоогоор хэмжигдэх өндөр хүү төлж байсан 18645 зээлдэгчид  энэ оны нэгдүгээр сарын 30-ны байдлаар найман хувь руу шилжсэн байна. Ингэснээр нэг зээлдэгч сардаа 400 мянган төгрөгийн хэмнэлт гарч байгаа юм. Одоогоор 64 мянган өрх найман хувийн зээлээр байртай болжээ. 

Төвбанкны санхүүжүүлсэн хөтөлбөрүүдийн зээлийн эргэн төлөлт нэг жилийн хугацаанд 40 хувиар буурсан үзүүлэлттэй гарсан. Үүнээс үүдэж банкууд зээлийн шалгуур үзүүлэлтээ өндөрсгөж дунджаар 1.3 сая төгрөгийн орлоготой өрх орон сууцанд орох боломж бүрджээ. Хэрэв таны сарын орлого үүнд хүрч, урьдчилгаа 30 хувь бэлэн байвал найман хувийн зээл авахад саадгүй аж.