Арилжааны банкууд энэ оны нэгдүгээр сард нийт 1280 зээлдэгчид 75.1 тэрбум төгрөгийн ипотекийн зээл шинээр олгосноор банкуудын ипотекийн зээлийн үлдэгдэл 2898.8 тэрбум төгрөг, нийт зээлдэгчдийн тоо 67233-т хүрсэн тоон үзүүлэлт гарчээ. Тодруулбал, тайлант сарын эцэст банкуудын ипотекийн зээлийн үлдэгдлийн жилийн өсөлтийн хурд өмнөх сартай харьцуулахад 3.3 нэгж хувиар, өмнөх оны мөн үеэс 92.6 нэгж хувиар буурсан байна.

Түүнчлэн арилжааны банкуудын ипотекийн зээлийн үлдэгдлийн 71.5 хувь буюу 2073.0 тэрбум төгрөгийг “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээл (жилийн найман хувийн хүүтэй зээл болон найман хувийн хүүтэй зээлд шилжүүлсэн зээл), 26.1 хувь буюу 756.7 тэрбум төгрөгийг банкуудын өөрийн эх үүсвэрээр олгосон зээл, 2.4 хувь буюу 69.2 тэрбум төгрөгийг бусад эх үүсвэрээр олгосон зээл бүрдүүлж байгаа юм. 

Харин ипотекийн зээлийн үлдэгдлийн 98.1 хувь нь төгрөгийн зээл, 1.9 хувь нь гадаад валютын зээл байгаа бол ипотекийн зээлийн үлдэгдэлд эзлэх хугацаа хэтэрсэн зээлийн хувь тайлант сарын байдлаар 2.1 хувь, чанаргүй зээлийн эзлэх хувь 0.5 байна.