Улаанбаатар хэмээх өрх айлд тулгамдсан асуудал их ч хамгийн хүндрэлтэй байгаа нь дэд бүтцийн хүрэлцээ гэж хэлж болно.  Ер нь нийслэлийнхэн нэг дороо шавж байгаа нь дэд бүтцийн хүрэлцээгүйгээс үүдсэн ч гэж хэлж болно. Сүүлийн үед барилга угсралтын компаниудын хувьд барилга угсралтын зөвшөөрөл авахаас илүүтэй ус, дулаан хангамжийн холболт авах нь хамгийн хэцүүд тооцогдоод байна. Тэгвэл саяхан нийслэлийн удирдлагууд  Гэр хорооллын дахин төлөвлөлтийн хүрээнд  МҮОНРТ-ын болон Дэнжийн 1000 орчимд баригдах орон сууцны хорооллыг дулааны эх үүсвэрээр хангах, хотын төвийн дулааны гол шугамыг өргөтгөх, Их тойруугийн өндөр хүчдэлийн шугамын тасархай хэсгийг холбох зэрэг Засгийн газрын хэмжээнд шийдвэр гаргах томоохон асуудлуудыг шийдвэрлэж өгөхийг салбарын сайдаас хүсчээ.
Эрчим хүчний сайд  Д.Зоригт дээрх асуудлуудыг анхааралдаа авч, ойрын хугацаанд  Засгийн газрын хуралдаанд оруулж шийдвэрлэхээ амлажээ. Харин  Нийслэлийн  удирдлагууд зам, барилгын ажил тун удахгүй эхлэх тул дөрөвдүгээр сарын 1-нээс өмнө шийдвэрлэж  өгөхийг хүсчээ.