Дэвшилтэт технологийг шингээсэн нь:

Лед – Led гэдэг бол Light Emitting Diode буюу гэрэл түгээгч диод гэсэн үг. Хамгийн чухал нь энэхүү гэрэлд агуулагдаж байгаа энерги нь гол давуу тал. Энэ нь энгийн гэрлүүдтэй харьцуулбал 70-80 хувийн хэмнэлттэй.
Баримт: Энэхүү гэрлийг бүтэн жилийн турш хэрэглэхэд тухай жилдээ өөрийн өртгөө нөхнө. Харин хоёр дахь жилээс эдийн засгийн үүднээс нь тооцож үзэхэд үр ашгаа өгч, хэмнэлтээ жинхэнэ утгаар нь үзүүлэх ажээ.



Жижиг ширхгэн хэсгүүдээс бүрдэх лед гэрлийн онцлог чанар нь хагас дамжуулагчдаа байдаг. Хүн итгэхгүй байх л даа. Гэвч үнэндээ хагас дамжуулагчийн лед чип дотор алт хүртэл ордог гэнэ. Мэдээж алтны хэмжээ маш бага. Жирийн гэрлүүдийн  чипний доторх утсыг хөнгөн цагаанаар шийддэг ч энд хүний үсний ширхэгийг 20-30 хуваасантай тэнцэх нарийхан алт ордог байна. Баталгаат хугацааг жинхэнэ утгаар нь амласан Эрдэнэт лед гэрлийн үйлдвэрийнхэн чанарыг нь бодоод Тайваны алтны хольцтой, “EpiStar” брэндийн чипээр технологио шийджээ.



Иймээс гэрлийн үнийн хувьд 4000-9000 төгрөгний үнэтэй байна. Үнэндээ энэ тийм ч өндөр үнэ биш . 
Нэг бүрчлэн гүйцэтгэсэн нарийн хэмжээст чипүүдийг тусгай хавтан дээр гагнаж байгаад угсардаг нь технологийн хувьд тун ч давуу талтай гэнэ.   
Дэвшилтэт технологийг ашигласан бүтээгдэхүүнийг хэрхэн үйлдвэрлэж байгаа дамжлагыг уншигч танд фото мэдээгээр, тайлбарлан хүргэе.
 








                                                                   ҮЙЛДВЭР НЭЭСЭН ТҮҮХ

- Барилга.МН сэтгүүл: Анх хэрхэн үйлдвэрээ байгуулж байсан бэ?

Бидний хувьд бүгдээрээ цахилгаан, электроник, автоматжуулалтын инженер мэргэжилтэй. Анх Эрдэнэт хотынхоо гудамжны чимэглэл, рекламны гэрэлтүүлгийн захиалгын ажлыг гүйцэтгэж байхад урд хөршөөс авчирсан гэрэл төдийлөн чанартай бус байсан. Гэрэлтүүлгийг гүйцэтгэх гол материал нь мэдээж Эрээн хотоос ирсэн. Ингээд л бидний хэсэг нөхөд энэ үйлдвэрийг байгуулаад чанартай атлаа, эрчим хүчний хэмнэлттэй, найдвартай гэрлийг эх орондоо бүтээе, дотоодын хэрэгцээгээ хангая гэж шийдээд л сэтгэл санаа нийлсэн дөрвөн найз зорилгоо тодорхойлон үйл ажиллагаагаа эхэлсэн.

Бид мэдээж суурь судалгаануудыг олон талаас нь нухацтай хийсэн, туршсан. Хятадын Гуаньжу хотод болдог олон улсын барилгын үзэсгэлэнг дөрвүүлээ очиж үзсэн. Бидэнд хөрөнгө оруулагч байхгүй, өөрсдийн орон гэрээ барьцаалж байгаад ч хамаагүй, зээл авч хөрөнгийн эх үүсвэр олж үйлдвэр байгуулъя гэж сэтгэл шулуудсанаас зориглон хөдөлсөн. Банкнаас зээл аваад өнгөрсөн 6 дугаар сараас эхлээд л үйлдвэр барих ажилдаа орсон доо. Бидний хоёр нь хоосон хашаанд үйлдвэрийн барилгын сууриа цутгаад эхлэхэд хоёр нь бүтээгдэхүүнээ авахаар хилийн дээс давсан.
Ингээд л 9 дүгээр сар гэхэд үйлдвэрийн барилга босохтой зэрэгцэн тоног төхөөрөмж ч ирээд эхний ажлуудаа гүйцэтгээд эхэлсэн дээ.

- Барилга.МН сэтгүүл: Та бүхэнд төрөөс дэмжлэг үзүүлдэг үү?

Хөрөнгө мөнгө, татварын хувьд төдийлөн хөнгөлөлт байхгүй л дээ. Гэхдээ бидний ажлыг үнэлээд, орон нутгий төрийн байгууллагаас дэмжих болсон. Үүний нэг илрэл нь аймгийн ЗДТГ-аас бидэнд захиалга өгч тодорхой ажлууд гүйцэтгүүлж байна. 2015 онд бусад талаар дэмжинэ гэдгээ орон нутгийн удирдлагуудын зүгээс илэрхийлсэнд нь баяртай байгаа.

- Барилга.МН сэтгүүл: Танай лед гэрлийн тухайд малчид их сэтгэл хангалуун байна гэж сонссон.

Бидний үйлдвэрлэж буй гэрлийн хамгийн гол давуу тал нь тусгалын хувьд өргөн далайцтай. Түүнчлэн эрчим хүчний хувьд жирийн гэрлүүдтэй харьцуулахад 60-80 хувийн хэмнэлттэй. Ямар ч төрлийн мушгиа гэрлийн хувьд мөнгөн усны хор тодорхой хэмжээгээр агуулагддаг бол бидний лед гэрлийн хувьд огт тийм зүйл байхгүй. Ингэхээр бид эко бүтээгдэхүүн үйлдвэрлэж байгаадаа баяртай байдаг.
Нэг зүйлийг энд онцлоход хоёр жилийн дараа гэрэл нь шатахад зөвхөн шатсан хэсгээ л засуулаад үлдсэн хэсгийг хаялгүйгээр үргэлжлүүлэн ашиглах боломжтой гэдгээрээ онцлогтой.

 Үндэсний үйлдвэрлэгчтэйгээ хамтарч ажиллах хүсэл

Мэдээж лед гэрлийг үйлдвэрлэхэд дан ганц гэрэл биш хуванцар эдлэл, төмөр материал гээд олон түүхий эд материал шаардлагатай болдог байна. Тэдгээр материалуудыг бүгдийг урд хөршөөс авчирдаг. Тэгвэл “Эрдэнэт Лед Гэрлийн Үйлдвэр”-йин ганц хүсэл бол дотооддоо дээрх түүхий эдийг  үйлдвэрлэх үйлдвэрлэлүүд олноор бий болоосой гэсэн хүсэл. Ингэж гэмээнэ эх орондоо хөрөнгө оруулалт хийж, дотоодын үйлдвэрлэлээ хөгжүүлэх гэсэн эрмэлзэл биелэгдэнэ. Тиймээс үйлдвэрийн барилгынхаа төмөр хийцийг хүртэл “Анд-Энерги”-ийн хамт олон мөн л Монголынхоо “Ган хийц” компанийг сонгон захиалж гүйцэтгүүлжээ.

Түүнчлэн Эрдэнэт хотын томоохон үйлдвэрүүдийн нэг болох зэс утас үйлдвэрлэгч, “Эрдмин” компаниас цахилгааны зэс утсаа тогтмол авдаг. Энэ мэтчилэн тэдэнд бүтээсэн гэрлээ савлаж, захилагч хэрэглэгчдэд нийлүүлэхэд цаасан сав, баглаа боодлын дотоодынхоо үйлдвэртэй ч хамтран ажиллах сонирхолтой байгаагаа биднээр дамжуулан мэдээлж байна. Бүхий л түүхий эд болоод дагалдах хэрэгслийг дотооддоо цогцоор нь шийдэх нь л эдний хамт олны хүсэл зорилго.
Дотроо өвөртөлсөн бас нэгэн том зорилго нь урд хөршөөс оруулж ирэх түүхий эд, бүтээгдэхүүнийг бууруулах, тэдэнд оруулах хөрөнгө оруулалтыг багасгахын тулд залуус маань хөнгөн цагаан хайлуулах үйлдвэр байгуулахаар төлөвлөжээ. Цаашлаад хуванцар болоод бусад дагалдах түүхий эдээ ч өөрсдөө үйлдвэрлэхээр зорилго тэмүүлэл дүүрэн ажиллаж байна.

Жижиг том гэлтгүй бүхий л зүйлсийг дотооддоо “шингээж” үлдээх нь залуусын эрмэлзэл.
Цаашид зарын урсдаг самбар, реклам сурталчилгааны дэлгэц, гудамжны зурагт, урсдаг гэрэл, гоёл чимэглэл гээд олон зүйлсийг үйлдвэрлэх, хийж бүтээхээр зориг шулууджээ. Энэ талын туршилтууд ч эхнээсээ амжилттай хийгдсээр байгаа аж.

                            Дэлхийн үйлдвэрлэлийн хөгжлийн чиг хандлага: 

 “Цогцоороо, хоорондоо уялдаатай, гадны хамааралгүй байхыг үйлдвэрлэл гэнэ” гэсэн үгийг хаа нэгтээгээс уншиж байсан юм байна. Өнөөдөр дэлхийн үйлдвэрлэлийн чиг хандлага нь тухайн бүтээгдэхүүний эд анги бүрийг тус тусын газруудаар гүйцэтгэлийг нь хийлгээд харин нэгтгэн угсарч, эцсийн бүтээгдэхүүн болгох нь нэг л компаний нэр хүнд болоод түүнд чанарын баталгаагаа шингээдэг. Энэ бол дэлхийн үйлдвэрлэлийн чиг хандлага.

Энэ хандлагыг дагаж мөрдөн ажиллахыг лед гэрлийг үйлдвэрлэгчид зорьж байгаа хэдий ч дотоодын үйлдвэрлэл ялангуяа гэрлийн чиглэлийн үйлдвэрлэлийн хөгжил Монголд сул хөгжиж байгаа нь харагдана. 
Орон нутагтаа бас дэмжлэг үзүүлэх зорилгоор цахилгааны мэргэжил эзэмшсэн хүүхдүүдийг энэхүү нарийн мэргэжилд сургаж, дадлагажуулан ажиллуулж ажлын байрны тоог нэмэгдүүлэхэд  ч хувь нэмрээ өөрсдийн хэмжээнд оруулсаар байна.  

                            Хийсэн бүтээлүүдийн дээжис

Байгуулагдаад удаагүй ч Орхон аймгийн албан байгууллага, хувь хүмүүст гэрэл гэгээ нэмсээр байна. Үндэсний үйлдвэрлэлээ дэмжиж ”Эрдмин” “Эрдэнэт Хивс”, Худалдаа Хөгжлийн банкны Орхон аймаг дахь салбар, Мобикомын Орхон аймаг дахь салбар, Зохимж дэлгүүр, Төгөл группын Чингис ресторан, Нутгийн Удирдлагын Ордон, Танил Талст дэлгүүр, Төв аймгийн Заамар сумын Хайлааст баг, Наран цогцолбор сургууль, МУИС-н Орхон аймаг дахь салбар сургууль, Баян-Өндөр цогцолбор сургууль, 13р сургууль, 6-р бага сургууль, Архангай аймгийн Өндөр-Улаан сум, Энэрэл төв, ОРХОН БОЭТ, Жаргалант сумын эмнэлэг, LIKE авто угаалгын газар зэрэг байгууллагууд “Эрдэнэт Лед” гэрлийн үйлдвэрийн гэрлүүдийг худалдан авч эрчим хүчээ хэмнэн, үр ашиг болоод чанарыг мэдэрч эхэлжээ.







Орхон аймгийн удирдлагууд тус үйлдвэрийг дэмжиж төв гудамж дагуух мушгиа хэлбэрийн боргоцой чимэглэлийг хийх ажлыг даалгахад тус үйлдвэрийн залуус 14 хоногийн дотор 1000 гаруй гэрэл үйлдвэрлэн монтажилж байрлуулсан нь хотын өнгө үзэмж гэрэлтүүлгийг нэмэгдүүлсэн байна.





Мөн тус үйлдвэр 11 сараас эхлэн малчдад зориулсан 12 вольтын лед гэрлийг үйлдвэрлэж 21 аймаг даяар борлуулахаар болжээ.Эрдэнэт хотод бараан захад байрладаг малчдын “Зэв” дэлгүүрээс лед гэрлийг авч болох юм байна. 2015 онд үйлдвэрлэлийн үйл ажиллагаагаа өргөтгөж гудамжний Лед дэлгэц, Урсдаг самбар, Хөнгөнцагаан хайлуулах үйлдвэр байгуулах төлөвлөгөөтэй байгаа бөгөөд анхны урсдаг самбараа хийгээд 4-р сургууль дээр байрлуулсан бол одоо лед дэлгэцний туршилтын загвараа хийж эхэлсэн байна.
Ийнхүү Мэдлэгт суурилсан Эрдэнэт хөтөлбөрийн хүрээнд байгуулагдсан “Эрдэнэт Лед” гэрлийн үйлдвэрийн залуус Орхон аймгийн хөгжилд үнэтэй хувь нэмэр оруулж эхэллээ.
 


    Нөхөрлөлийн зам бүлээн байг

     Уулын баяжуулах Эрдэнэт үйлдвэрт инженер ажилтай, дөрвөн найз энэхүү үйлдвэрээс ажил амьдралын гараагаа эхлүүлсэн түүхтэй. Одоог хүртэл энэ үйлдвэртээ ажиллангаа үндэсний үйлдвэрлэлдээ хувь нэмрээ оруулсаар байна. Цахилгааны инженерийн мэргэжил эзэмшсэн тэд эх орныхоо хөгжилд өөрсдийн хувь нэмрээ оруулах гэсэн ижилхэн дөрвөн хүсэл тэмүүлэл нь эдгээр залуусыг нэгтгэжээ.

Эрдэнэт үйлдвэрээс төрсөн дөрвөн андыг магтан сайшааж, тэднээр бахархах нутгийн төрийн болон төрийн бус байгууллагууд, иргэд цөөнгүй.
Дөнгөж хөл дээрээ босож байгаа тус компаний залуус нэгийгээ Захирлаар томилж, ажлаа хуваарилан авч өөр өөрсдийн хүлээсэн үүрэгт ажил болох үйлдвэрлэл, тоног төхөөрөмж, судалгаа шинжилгээ, менежерийн ажлаа гүйцэтгэн гар нийлэн зүтгэж байна.

“Үндсэн ажлын хажуугаар бизнес хийлээ” гэж Эрдэнэт үйлдвэрээс шүүмжлэх биш харин ч дэмжиж, залуусын санаачлагыг сайшаадаг нь бас нэгэн “боломж”. Хүсэл эрмэлзлээр дүүрэн залуу насны нөхөрлөлийн илрэл нь энэхүү үйлдвэр. Нөхөрлөл, итгэлцэл, зорилго нэгтэй учраас л энэхүү үйлдвэрээ байгуулсан гэдгээ нэгэн дуугаар хэлж байгаа эдний хамт олон үйлдвэрлэж буй бүтээгдэхүүнээ экспортонд гаргах нь бас нэгэн том зорилго гэнэ.
Нэгэнт зорилгоо тодорхойлсон залуус ирээдүйг харсан учир зөвхөн урагш тэмүүлэх л хүсэлтэй.

“Үндэсний үйлдвэрлэлээ дэмжье” гэх боловч манай бүтээгдэхүүн Хятадаас орж ирсэн бүтээгдэхүүнээс үнэтэй болдог учир “урд хөршийг л зорих нь зөв” гэдэг сэтгэлгээг халах шаардлагатай байна. Мэдээ мэдээллийн орчин өндөр түвшинд бүрэлдсэн энэ цаг үед бүтээгдэхүүний чанар стандартын талаар нарийн мэдлэг, мэдээлэлтэй болж байгаад хөрөнгө оруулалт, үйл ажиллагааны чиглэлий сонголтоо хийгээрэй гэдгийг эелдгээр сануулъя.      
Та нарт амжилт хүсье.