Өдгөө дэлхийн олон улс оронд барилгын дээврийн шийдлийг хавтай байдлаар хийж ногоон байгууламж бий болгох нь нийтлэг болсон. Барилгын салбартай холбоотой мэдээ, нийтлэл бичдгийнх гадаадын олон барилгын ногоон дээвэрт атаархаж, нийслэл хотынхоо газарт тарьж чадахгүй байгаа ногоон ургамлыг байшингийн дээвэр дээр ч болов тарихсан  хэмээн мөрөөддөг юм. Харин ийм боломж манайд хэдийнээ нэвтэрчээ. Хамгийн чухал нь хэрэглэх, ашиглах тал дээр бид жаахан хойрго хандаж байгаа юм. Тухайлбал “Фүжи-Алтай” компани нь 2011 оноос Монгол улсын барилга байгууламжийн дээврийн материалын  зах зээл дээр АНУ-ын “Firestone Building Products” компанийн ЭПДМ буюу Этилен Пропилин Дайн Терполимер Мембран суурьтай нэг үет дээврийн хуйлмал резинэн материалыг импортоор оруулан, дээврийн болон ус тусгаарлалтын ажлыг гүйцэтгэж байгаа юм. Энэхүү материалаар дээврийг шийдэх нь олон төрлийн давуу талтай төдийгүй хамгийн чухал нь уг материал дээр хар шороо,  элсэн давхарга үүсгэх замаар зүлэг, ургамал тарьж болдог аж. Энэ нь тухайн байгууллагыг рекламдсан хэрэг огтхон ч биш бөгөөд үүнтэй төстэй олон төрлийн дээврийн материал эх орны барилгын салбарт нэвтэрч зүлэг тарих газаргүй болсон нийслэл хотын газарт бага боловч ногоон орчин бий болгох гэснийх билээ.

Гэвч өндөр зэрэглэлийн байшинд ногоон дээвэр хийхээс гадна ердийн түгээмэл стандарт ангиллын барилгуудыг ч ногоон байгууламжтай болгочихвол эхчүүд хүүхдээ салхилуулахдаа, эмээ өвөө нар хууч хөөрч нарлахдаа хотын чимээнээс холхон дээвэр дээрээ тав тухыг мэдрэх боломж байна. Иймд Монголын барилгын салбарынханд хандаж хотын гудамжинд тарьж чадахгүй байгаа зүлэг ногоогоо барилгын дээвэр дээр таръя хэмээн уриалмаар санагдлаа.