Нийслэл хотын гудамж, талбайн гэрэлтүүлэг нэг үеийг бодоход олширч, өнгө үзэмж ч сайржирсан.  Гэвч үүнийг унтраахгүйгээр өдөржин асаах нь нэг л тийм санагдав. Сүүлийн үед амтай бүхэн ярьж байгаагаас ч тэр үү ХЯМРАЛ, ХЭМНЭЛТ гэдэг хоёр үг бол шууд л толгойд туслаа. Улаанбаатар хотын төвийн дүүрэгт өдрийн 13 цагт гудамжны гэрэлтүүлэг ярайтал асч байгаа нь төрийн ажлын хариуцлагагүйн нэг жишээ биз ээ. Хувийн хөрөнгөнөөс эдгээр гэрэл асаасны төлбөрийг төлдөг бол хэн ч, хэзээ ч өдрийн цагаар гэрлийг асаагаад мартаж орхихгүй нь лавтай.
Нийслэлийн гэрэлтүүлгийг хариуцсан байгууллага дүүрэг тус бүрт байдаг аж. Нэгдсэн байдлаар нийслэлийн Захирагчийн ажлын албанд хамрагддаг бололтой. Нийт 13 мянга гаруй гудамжны гэрэлтүүлэг байдаг гэсэн тоо байгаа ч энэ нь баттай эх сурвалжаас авсан мэдээлэл бас биш юм.  Ямартай ч энэ олон тооны гэрэл бүгд биш ч багагүй хэсэг нь өдөр байгалийн гэрэлтэй үед асаалттай байгаа нь хэний буруу вэ?