Барилгын салбар шинэ сайдтай болоод тун удаагүй байна. Улаанбаатар хотод төрсөн. Москвагийн Олон улсын харилцааны дээд сургууль, Австралийн Үндэсний их сургуулийг төгссөн. ХБНГУ, Голланд, Швейцар улсад болон  АНУ-ын Харвардын их сургуульд мэргэжил дээшлүүлсэн.
Гадаад хэргийн яамны Ази, Африкийн газарт атташе, тус яамны Гадаад худалдаа, хамтын ажиллагааны газарт мэргэжилтэн, Олон талт хамтын ажиллагааны газрын дэд захирал, Монгол Улсын Ерөнхийлөгчийн гадаад бодлогын зөвлөх, Гадаад харилцааны яамны Төрийн нарийн бичгийн дарга, Монгол Улсын Ерөнхий сайдын зөвлөх, Байгаль орчин, аялал жуулчлалын сайд, Монгол Ардын Намын Гадаад харилцаа хариуцсан нарийн бичгийн даргаар ажиллаж байсан, Дамдины Цогтбаатар гэгч эрхэм энэ суудалд ирснийг хэн хүнгүй мэдэж байгаа нь лавтай. Гэвч түүнийг шаггүй нийтлэлч гэдгийг нь тэр бүр гадарлахгүй л болов уу. 
     Өдөр тутмын ажлаас өөрт сонин содон санагдсан зүйлс, алдаа дутагдлын талаар бичихээс гадна асуудал хөндсөн “Жижиг орны уужуу бодлого”, “Ташаа үзүүлэлт, ташаа бодлого” зэрэг нийтлэлүүд нь уншигчдаас багагүй үнэлэгээ авсан байна. Хамгийн сүүлд  “Шинэ 2015 онд шивнэх хүсэл”  гарчигтайгаар нэгэн нийтлэл цахим ертөнцөд тавигджээ.  Энэхүү бичвэртээ “  Шинэ 2015 он гарч анхны ажлын өдөр эхэлж байна. Энэ он бидний тэвчээр, ухааныг сорих жил байх бололтой. Юуны өмнө мөрөөдөл, хөөрлийн оронд залраад удаж буй төсөв, эдийн засгаа эрүүлжүүлж, бодит хөрсөн дээр нь тавих хэрэг байна. Ядаад чингэх эхлэлийг тавих ёстой. Ингэхийн тулд олон зүйлсийг хийх шаардлагатай байгаа. Гэхдээ Монголын улс төр эн тэргүүнд хийрхэлээсээ салвал зохино. Энэ бол амаргүй сорилт”. гэх зэргээр бичжээ.  Түүнчлэн “Бид дутагдлаа ойлгож зоримог алхамуудыг эхлүүлсэн. Үүнийг хөгжүүлж үр дүнд хүргэх нь харин нэн чухал байна. Товчхондоо хэлэхэд хийрхэлээс хагацахгүйгээр эдийн засгийн уналтаас гарахгүй...” хэмээн дүгнэжээ.
Өөрөөр хэлбэл Д.Цогтбаатар сайдыг шинэ онд шивнэсэн  хүсэл нь хийрхлээс салах тухай байсан юм.  Нээрээ ч төр засаг ер хаана ч нам дагасан, намаар хуваагдсан нэг тийм олиггүй хийрхлээс салах болтугай.