“Ашиглалтын шаардлага хангахгүй болсон нийтийн зориулалттай орон сууцны барилгыг дахин төлөвлөж барилгажуулах журам”-ыг өнгөрсөн онд батлаж, Нийслэлийн Засаг Даргын захирамжаар эхний ээлжинд 21 барилгыг дахин төлөвлөхөөр болсон билээ. Төсөл хэрэгжүүлэгчдийг сонгон шалгаруулах урилгыг 5 багцад зарласны дагуу 6 аж ахуйн нэгж 8 багц төсөл ирүүлснээс Нэхмэлийн шарын 1, 2, 5, 6, 7, 10, 11, 16 дугаар байруудад “Фүжи холдинг ББСБ” ХХК, 3, 4, 8, 9 дүгээр байруудад “Рендер бау” ХХК, 15, 19 дүгээр байруудад “Нутгийн буян групп” ХХК шалгарсан бөгөөд Нийслэлийн Засаг Дарга Э.Бат-Үүл эдгээр аж ахуйн нэгжид төсөл хэрэгжүүлэгчийн батламжийг гардуулан өглөө.
       Ингэснээр дахин төлөвлөлт хийгдсэн цагаас хэл ам дагуулсан  нэхмэлийн шар байрыг шинэчлэн барих барилга угсралтын компанийн сонгон шалгаруулалт нэг мөр болж буй бололтой. Дээрх шалгарсан компаниуд оршин суугчидтай зөвшилцөлд хүрсэн учир ирэх 3-р сарын 1-нээс оршин суугчдыг нүүлгэн шилжүүлж түрээсийн байранд оруулах бөгөөд 5-р сараас барилгын ажлаа эхлэхээр төлөвлөж байгаа юм байна.  “Фүжи холдинг ББСБ” ХХК гэхэд төслийг 24 сарын турш хийж гүйцэтгэхээр төлөвлөж байгаа бөгөөд төслийн хугацаанд оршин суугчдын амьдрах түрээсийн байрны төлбөрийг зургаа зургаан сараар, зах зээлийн үнэ ханшийн дагуу төлөх аж. Харин “Рендер бау” ХХК төслийн барилгын ажлыг мөн л 5-р сараас эхлүүлэхээр төлөвлөж, уг төсөлд 30 орчим сая доллар зарцуулахар тооцоолжээ.