Концесс гэж төрийн өмч буюу төрөөс үзүүлж буй үйлчилгээнүүдийг үр ашигтай удирдахын тулд харилцан ашигтай нөхцлөөр хувийн өмчийг татан оруулах  буюу төр-хувийн өмчийн хамтран ажиллах хэлбэр гэдгийг манай бизнеснийхэн, олон нийт сайн мэдэх бизээ. Манай улсад 2010 онд Концессийн тухай хуулийн төсөл  батлагдсанаас хойш ихэнх ажлууд концессээр хйигдэх болсон бөгөөд дашрамд сонирхуулахад ОХУ “барих-ашиглах-шилжүүлэх” хэлбэрийг л зөвшөөрдөг бол манайд “барих-ашиглах-шилжүүлэх”, “барих-шилжүүлэх”, “барих-өмчлөх-ашиглах”, “барих-өмчлөх-ашиглах-шилжүүлэх”, “барих-түрээслэх-шилжүүлэх”, “зураг төсөл боловсруулах-барих-санхүүжүүлэх-ашиглах”, “шинэчлэн сайжруулах-ашиглах-шилжүүлэх” гэсэн концессын орчин үеийн бүх хэлбэрүүдийг  ашиглах боломж  нээлттэй байдаг аж. 
     Нийслэлийн ИТХ-ын ээлжит 21 дүгээр хуралдаанаар саяхан болж Улаанбаатар хотод 2015 онд Концессоор хийж хэрэгжүүлэх ажлын жагсаалтыг баталжээ. Энэ онд нийслэлд барилга байгууламж, орон сууц, Авто зам, тээвэр, Боловсрол, биеийн тамир,соёл урлаг, спорт, Эрүүл мэнд, Инженерийн дэд бүтцийн салбарт нийт 37 бүтээн байгуулалтыг хийхээр төлөвлөсөн байна. Үүнд “Шинэ урт цагаан” төсөл буюу Урт цагааны барилгыг  буулган шинээр барих ажил, Сүхбаатар дүүргийн Засаг даргын тамгын газрын байрыг шинэчлэх ажил зэрэг багтжээ. Эдгээр 37 ажлын нэр, концессийн  төрөл зэргийг Улаанбаатар хотын цахим хуудсанд дэлгэрэнгүй танилцуусан байна лээ.