Монгол банкны захилгаар үл хөдлөх хөрөнгө зуучлалын “Тэнхлэг зууч”, “Актив зууч”, Монголиан пропертиз” компаниудын консорциум сар бүрийн нийслэлийн орон сууцны үнийн индексийг иргэд олон нийтэд танилцуулдаг уламжлалтай. Тэд өнөөдөр өнгөрсөн оны 12-р сард нийслэлийн орон сууцны үнийн өсөлт, бууралтын талаар танилцууллаа. Хэвлэлийн бага хуралд “Тэнхлэг зууч” ХХкийн захирал Б.Батзориг, Эдийн засгийн судалгаа эрдэм шинжилгээний хүрээлэнгийн судлаач З.Манлайбаатар нар хүрэлцэн ирж сэтгүүлчдийн асуултанд хариулт өгсөн юм.
      Өнгөрсөн сарын үнийн индексийн судлагаанд Улаанбаатар хотод борлуулагдахаар зах зээлд нийлүүлсэн шинэ, хуучин бүх төрлийн 4159 орон сууцны үнийг хамруулан тооцсон байна.  Судлагаагаар орон сууцны үнийн индекс нь өнгөрсөн 12-р сард суурь үнэ буюу 2013 оны нэгдүгээр сараас 18,9 хувийн өсөлттэй гарчээ. Энэ нь өмнөх сараас  -0,7 хувь буурсан үзүүлэлт гэнэ. Харин оны эхэн үетэй харьцуулахад -0,54 хувь буурсан бол тухайн жилийн өнгөрсөн оны мөн үеийнхтэй харьцуулахад яг адил буюу -0,54 хувиар буурчээ.  Түүнчлэн энэ нь үүнээс өмнөх дөрвөн сар орон сууцны үнийн индекс  бууралттай байсан бол өнгөрсөн 12-р сард хасах индекстэй гарч, нийт таван сар дараалан орон сууцны үнийн индекс буурсан үзүүлэлттэй гарчээ.
       Хэдийгээр орон сууцны үнэ ийнхүү дараалан буурсан үзүүлэлттэй гарсан боловч шинэ орон сууцны үнийн индекс суурь үе буюу 2013 оны нэгдүгээр сараас 26.8 хувийн өсөлттэй гарчээ. Өөрөөр хэлбэл орон сууцны үнэ буурч байгаа боловч 2013 оны нэгдүгээр сарын үнийн индекстэй  харьцуулахад дээрх хувиар, 12-р сарын үеийнхтэй харьцуулахад 5,29 хувь өндөр ажээ. Харин хуучин орон сууцны үнийн индекс 2014 оны 12-р сарын байдлаар  суурь үеэс 16,2 хувийн өсөлттэй гарчээ.  Энэ нь өмнөх сараас -0,79 хувиар буурсан, оны эхэн үе болоод өнгөрсөн оны мөн үеэс -3,3 хувиар буурсан үзүүлэлттэй байгаа аж.
  Орон сууцны үнийн индексийг хедоник регрессийн аргаар тооцож буй бөгөөд индекс тооцох судалгааны ажилд Эдийн засгийн судалгаа, эрдэм шинжилгээний хүрээлэн арга зүйн зөвлөгөө өгч, хамтран ажилладаг байна.