Нийслэл иргэдээ орон сууцтай болоход тодорхой хөнгөлөлтүүдийг үзүүлэх тухай сүүлийн үед эрчимтэй яригдах болсон. Энэ удаа хөнгөлөлттэй гэхдээ зорилтод бүлгийнхнийг орон сууцтай болгохоор зорьж байгаа нэгэн ажлын талаар нийслэл хотын захиргаанаас өнөөдөр   “Хангарьд” ордонд танилцуулсан бөгөөд энэ нь “Улаанбаатар хотын төлбөрийн чадавхид нийцсэн орон сууны стратеги” сэдэвт хэлэлцүүлэг байсан юм. Нийслэл хотоос 18 сарын туршид дээрх стратегийг боловсруулахаар ажиллажээ. Гэхдээ дангаараа бус. АНУ-ын Төлбөрийн чадварт нийцсэн орон сууцны хүрээлэн, Дэлхийн банкны хөнгөлөлттэй зээлийн хөрөнгөөр хэрэгжиж байгаа “Улаанбаатар цэвэр агаар төсөл”-ийн багийнхантай хамтран хийсэн байна.
Улаанбаатар хотын төлбөрийн чадварт нийцсэн орон сууцны стратеги нь бага болон дундаас доош орлоготой иргэдэд зориулсан бөгөөд энэ ангилалд нийслэл хотын иргэдийн 50 хувь нь багтдаг гэсэн судлагааг дээрх стратегийг боловсруулсан багийнхан гаргасан байна. Өөрөөр хэлбэл нийслэлийн нийт иргэдийн 50 хувь нь сард дунджаар 870,644 төгрөгөөс бага орлоготой учир төрөөс ямар нэгэн дэмжлэггүйгээр орон сууц худалдан авах боломжгүй аж. Эдгээр өрхийн амьдрах орчныг сайжруулах нь эргээд Улаанбаатар хотын хамгийн тулгамдсан асуудлууд болох агаар, хөрсний бохирдолыг бууруулахад бодит үр дүнгээ өгөх юм. Тийм ч учраас дээрх стратегийг боловсруулсан багийнхан барилгын салбарынхан, банк санхүүгийн байгууллагынханд хийх гэж буюу ажлынхаа талаар тайлагнаж санал бодлыг нь сонсож буй нь энэ юм. Уулзалт, хэлэлцүүлэгт Барилга хот байгуулалтын яам, Байгаль орчин ногоон хөгжлийн яам, нийслэлийн Ерөнхий төлөвлөгөөний газар, Гэр хорооллын хөгжлийн газар, Монгол банк, Сангийн яам, Монголын Ипотекийн корпориаци зэрэг төрийн байгууллагын төлөөлөл болон барилгын салбарын хувийн хэвшлийхэн, банк санхүүгийн байгууллагын төлөөлөл оролцож, өөрсдийн санал бодлыг хуваалцлаа.


Энэхүү стратеги нь богино, дунд, урт хугацаанд хэрэгжих богино хугацааны хөтөлбөрт энэхүү үйл ажиллагааг эхлэхэд шаардлагатай арга хэмжээ авах цаашид зохицуулах, жуучлах, үргэлжүүлэх үүрэг бүхий нийслэлийн орон сууцны байгууллагыг бий болгох мөн хууль эрх зүйн орчинг бүрдүүлэх зэрэг багтаж байгаа юм байна. Энэ асуудлыг хариуцсан байгууллага бий болсноор иргэдийн урьдчилгаа төлбөрт нь баталгаа гаргах, зээлийн батлан даалтын сан бий болох зэргээр бага болон дундаас дллш орлоготой иргэдийг орон сууцтай болоход нэг алхамаар урагшлуулах бөгөөд гэвч энэ байгууллага нь барилга барих бус зуучлах, зохицуулах хөндлөнгийн оролцоотой байх гэнэ.
Дунд хугацааны хөтөлбөрт дэд бүтцийн шугам сүлжээ бий болгох, орлого багатай өрхүүдэд урьдчилгаа төлбөрийн тусламж олгох, санхүүжилт болон хөнгөлөлтийг тохируулах зэрэг арга хэмжээ багтах юм.
Мөн хөтөлбөрийн хүрээнд бага болон дундаас доош орлоготой иргэдийг тодорхой үе шаттайгаар орон сууцжуулах бөгөөд нийслэл хотод хэдэн жил амьдарсан, өрхийн гишүүдийн тоо, орлого зэргээр нь ангиллан орон сууцаар хангах төлөвлөгөөтэй байгаа аж. Харин үүнийг хангахад мэргэжлийн хүмүүс ямар байр суурьтай болоцоо нөхцөлтэй байгааг сонсох нь өнөөдрийн хэлэлцүүлгийн гол зорилго байлаа. Хэлэлцүүлэг оролцогсод энэхүү арга хэмжээг дэмжиж байгаагаа илэрхийлж байсан.