Нийслэлээс угсармал орон сууцанд дулааны шинэчлэл хийх дэд хөтөлбөрийг баталж, энэ оноос зарим нэг сууцнуудад дулаалга хийхээр болсон. Улаанбаатар хотын хэмжээнд орон сууцны 14 хороололд 1965-2000 онд баригдсан угсармал орон сууцны 1077 барилгад 45462 өрх амьдарч байна. Эдгээр барилгууд нь хуучирч муудсны улмаас дулааны алдагдал ихтэй байгаа тооцоо гарчээ. Тиймээс энэхүү хөтөлбөрийг хэрэгжүүлж гадна хашлага хийцийг дулаалсанаар дулааны алдагдалгүй болохоос гадна эрчим хүч 30 хувь, халаалтын системийг шинэчилж тоолууржуулснаар 50 хувийн хэмнэлттэй болох бөгөөд уг дулааны эрчим хүчийг хэмнэснээр 3,4 хорооллын хэмжээний орон сууцыг дулааны эрчим хүчээр хангах эх үүсвэрийн нөөц  үлдэнэ. Энэ нөөцөөр дутагдаж байгаа эрчим хүчний хэрэглээг хангах боломжтой хэмээн тооцож байгаа аж.  Мөн барилгын ашиглалтын хугацааг уртасгаж үл хөдлөх хөрөнгийн үнэлэмжийг нэмэгдүүлэх давуу талтай.  Хөтөлбөрийн хүрээнд хуучны барилгуудын гадна хана, зоорийн давхар таазны дулаалга, гадна орцны цонх, хаалга солих юм.
Хөтөлбөрийг тодорхой үе шаттайгаар хэрэгжүүлэх бөгөөд улсаас дангаар шийдэх боломжгүй учир эдгээр  байруудад амьдарч байгаа иргэдээс тодорхой хэмжээний хөрөнгө гаргах шаардлагатай аж. Тийм учраас тухайн иргэдэд тодорхой дарамт үүүсгэхгүйн учир урт хугацааны зээл олгож, уг асуудлыг шийдвэрлэх гэнэ.