Дулааны алдагдалгүй эрчим хүчний хэмнэлттэй ханын материалыг үйлдвэрлэх боломжтой боллоо
Барилга, хот байгуулалтын сайд Д.Цогтбаатар барилгын салбарт бодитой хувь нэмэр оруулах, жилд 1 сая тонн цемент үйлдвэрлэх хүчин чадал бүхий Хөх цавын цементийн, 405 мян.м3 барилгын дүүргэгч материал үйлдвэрлэх хийт бетоны төслийн ажилтай тус тус танилцлаа.
Д.Цогтбаатар сайд Төв аймгийн Сэргэлэн суман дахь хийт бетонын үйлдвэрийн бүтээн байгуулалтын ажилтай танилцах үеэр компанийн зүгээс энэхүү үйлдвэр нь ашиглалтад орсноор 100 гаруй ажлын байр шинээр нэмэгдэх ба европын стандартын дагуу, хүний хөдөлмөр хөнгөвчилсөн, дулааны алдагдалгүй эрчим хүчний хэмнэлттэй шинэ дэвшилтэт ханын материалыг үйлдвэрлэх талаар танилцуулав. Харин Дорноговь аймгийн Даланжаргалан суманд баригдаж байгаа жилд нэг сая тонн цемент, барилгын материал үйлдвэрлэх хүчин чадал бүхий Хөх цавын цементийн үйлдвэр ашиглалтад орсноор 650 гаруй байнгын ажлын байр шинээр нэмэгдэж байгаа ба ажиллагсадын дийлэнх хувь нь орон нутгийн иргэд байгаа юм байна.
Мөн дотоодын цементийн хэрэгцээний 50 орчим хувийг ханган улс, орон нутгийн төсөвт бодитой хувь нэмэр оруулах ба барилгын салбарын өртөг зардал буурч, орон сууцны барилгын 1м2 талбайн үнийг багасгахад бодитой нөлөө үзүүлэх юм байна. Тус үйлдвэрийн онцлог давуу тал нь цементийг европ технологийн дагуу хуурай аргаар үйлдвэрлэж, шинжлэх ухаан технологийн хамгийн сүүлийн үеийн ололтыг бүрэн нэвтрүүлсэн, бүрэн автоматчлагдсан, ус, эрчим хүч, түлш, металлын зарцуулалт болон тоосжилтын хэмжээ хамгийн бага аж. Цаашид хууль эрх зүйн орчинг шинэчлэх ажилд тусгах зорилгоор томоохон төслүүдийг хэрэгжүүлэх явцад гарсан туршлага, төрийн шийдвэр гаргах явцад тулгарсан асуудлуудын талаар танилцуулга, санал бэлтгэж, ирүүлэх талаар салбарын сайд санал тавьсан ба цаашид барилгын салбарт шинэ техник, технологи нэвтрүүлэх ажлыг яамны зүгээс дэмжиж ажиллахаа илэрхийллээ.