Улаанбаатар хот дулаан хангамжийн дутагдал орж байгаа талаар барилгажилт эрчимжсэн үеэс ярьж, өнөөдөр эцсийн “цэгтээ тулаа” байгаа нь хэн бүхэнд ил болжээ. Энэ талаар Улаанбаатар дулааны сүлжээ төрийн өмчит хувьцаат компаний ерөнхий инженер Алтангэрэлийн манай сайтад өгсөн ярилцлагаас   http://news.barilga.mn/r/68641 уншиж болно.
Харин нийслэлийн дулааны хангамж хэцүүдэж байгаа талаар Төр засгийн удирдлагуудад хүрвэл хэлдэг ганц үг нь тав дахь цахилгаан станц барих тухай юм. Энэ үгэнд нь хууртаад хүлээгээд суудаг хүмүүс байгаа гэдгийг ойлгодог  эсэх нь бүү мэд. Гэхдээ ор сургүй алга болчихгүй яриад байгаа нь сайшаалтай ч юм уу. Хамгийн сүүлд өнгөрсөн намар 9-р сард тус станцыг барих газрын асуудлыг нэг мөр шийдлээ хэмээн Нийслэлийн  Засаг даргын тамгын газраас мэдэгдсэнээс хойш төр засгийн зүгээс өөр доривтой алхам хийсэн талаар сонссонгүй.  Ер нь 5-р цахилгаан станц баригдах тухай яригдсанаас хойш газрын асуудал байнга маргаантай байж, мэргэжилтнүүдийн санал бодол зөрөлдөн наашаа цаашаа болсоор нийт 7 удаа байршлаа сэлгэж байж эцэст нь дээрх байршилд барихаар болж байх шиг. Тэгэхээр байршлын тухай дор хаяж долоон удаа хэвлэлээр ярьжээ. Иймэрхүү ахисан дэвшсэн зүйлгүй нэг зүйлийн талаар үе үе сураг гардаг тавдугаар цахилгаан станцын сураг сая бас нэг сонсогдов. Энэ нь Европын сэргээн босголт хөгжлийн банк тавдугаар цахилгаан станцад хөрөнгө оруулах тухай юм.
Хүлээж байгаа нийслэлийнхэн тэр тусмаа дулаан хангамжийн техникийн нөхцлөө авч чадахгүй байгаа барилгынханд арай “дэвшилттэй” мэдээ  энэ бололтой. Харин хэзээ барих, ашиглалтанд орох талаар хэн ч  хэлж мэдэхгүй байна.