Дэлхийд хүн төрлөхтний ур ухааны гайхамшиг болсон уран барилга олон бий. Ийм нэгэн урлагийн бүтээлийг уншигчиддаа танилцуулахаар бэлдлээ. “Валт десней” /Walt Disney/ компани нь хүүхдэд зориулсан олон киногоороо дэлхий нийтэд танигдаж эхлэсний дараагаар өөрийн нэрийн хуудас болсон концертын танхимыг бий болгохыг зорьсноор нэгэн гайхалтай гоёмсог барилга баригдах үндэс болсон байна.
         Уг барилга нь Америкийн нэгдсэн улсын Калифорни мужийн Лос-Анжелес хотын өмнөд дүүрэгт байрлах бөгөөд тус хот дахь концертийн дөрөв дэх төв юм. 2003 оны 10-р сарын 24-нд нээлтээ хийсэн харьцангуй “залуу” барилга ч гэсэн анх баригдаж эхлэснээс хойш есөн жилийн дараа ашиглалтанд орсон юм. Ийн удах болсон шалтгаан нь үнэхээр гайхалтай, мөн чанартай сайн зүйл хийх гэсэн хүслээс үүдэлтэй гэнэ.
          “Валт десней” концертийн  барилгын зургийг алдарт архтекторч Франик Кери /Frank Gehry / зурсан бөгөөд уг барилгын зөвхөн газар доорх ажил 1992 онд  эхлэж 1996 онд дуусчээ. Харин энэ хэсгийн ажлыг дуусгахад л  110 сая доллар зарцуулсан гэдэг. Барилгын ажлыг цааш үргэлжлүүлэхийн тулд  Лос-Анжелес хотын захиргаанаас бонд гарган борлуулж, барилгын гаднах  фасадыг ган төмрөөр хийхээр төсвийг нь гарган зургийг нь шинэчлэн дахин баталсан байна.
           2003 онд энэхүү барилга баригдаж дуусахад нийт 500 сая гаруй долларыг зарцуулсан гэсэн тооцоо гарчээ. Барилгын нээлтийн ажиллагааны үеэр Лос-Анжелес хотын иргэдэд үнэ төлбөргүй танилцуулсан бөгөөд концертын гурван танхимтайгаас гадна дуучид, балетын бүжигчид, найрал хөгжимчид, циркийн жүжигчдийн тус бүрийн мэргэжлийн онцлогт тохирсон дасгалын болон амралтын өрөөний тохижилт, гэрэлтүүлэг зэрэг нь одоогоор хүн төрлөхтний нээж, амьдралд нэвтрүүлсэн хамгийн дээд ололтуудыг ашигласнаараа давуу талтай гэнэ. Концертын танхимуудын дуу чимээний ялгарлыг дамжуулах байдал нь хамгийн гайхалтай байлаа гэж Японы нэгэн хөгжмийн удирдаач хэлсэн гэнэ. Дэлхийн алдартай уран бүтээлчдийн мөрөөдлийн тайз болсон “Валт десней” концертын төв нь уран барилгынхаа төлөвлөлт хийц, маягийн хувьд гайхамшигтайд тооцогдоно.
          Найман орны барилгачдын хөлс хөдөлмөрөөр есөн жилийн турш боссон энэ барилга архитектурын шийдлийн хувьд онцгой өвөрмөц юм. Сүүлийн үед баригдсан  “залуу” барилгын хувьд орчин үеийн сонгодог хэв маягийн дэвшлийг  илт шингээж өгчээ. Хэлбэр хийцийн хувьд ч яг тийм хэлбэртэй гэж онож хэлэхэд бэрхтэй бөгөөд мурай, тахир , долгиолсон хэсгүүдэд нь нарны тусгал хэрхэн тусахыг анхнаас нь тооцоолсны улмаас зэвэрдэггүй ган төмрөөр гадна фасадыг бүржээ. Концертын танхимын дотоод заслууд ч нэг загвар маягт баригдаагүй орчин үеийн хэлбэр хийцлэлтэй бөгөөд Дугласын нарс модоор хана, шалыг хийсэн байна.