Барилга, хот байгуулалтын сайд  Д.Цогтбаатар саяхан БНХАУ, Сингапур Улсад ажлын айлчлал хийгээд ирсэн билээ. Айлчлалын үеэр сайд хямд өртөгтэй орон сууцны асуудлаарх олон улсын 6  дугаар  уулзалтад оролцжээ. Мөн  Сингапурын Үндэсний хөгжлийн тэргүүн дэд сайд бөгөөд Үйлдвэр худалдааны тэргүүн дэд сайд Ли И Шиан, Парламентын гишүүн, “Амьдрахад таатай хотууд төв”-ийн хүндэт зөвлөх Ма Бау Тан, Хөрөнгийн биржийн Тэргүүн дэд ерөнхийлөгч Мохамед Насер Исмайл нартай ажлын уулзалт хийж, барилгын салбар дахь хамтын ажиллагааны талаар санал солилцсон байна.
       Уулзалтын үеэр сайд Cингапур Улс иргэдийн төлбөрийн чадварт нийцсэн орон сууцны тогтолцоог амжилттай хэрэгжүүлсэн, уг асуудлыг нийгмийн даатгалын сантай уялдуулан шийдсэн туршлагыг судлах, хамтарсан төсөл хэрэгжүүлэх зэрэг хамтын ажиллагааны боломжит хувилбаруудыг эрэлхийлж ажиллахыг санал болгосон аж.  Хямд өртөгтэй орон сууцны тогтолцоог нийгмийн даатгалын сантай уялдуулан шийдэх асуудлыг сайтар судалж  хамтран ажиллахаар болсон нь Барилга, хот байгуулалтын сайдын айлчлалын гол үр дүн болсон тухай мэдээлэв.