Мэргэжлийн хяналтын ерөнхий газраас  /МХЕГ/ өнөөдөр өнгөрсөн 3-р сарын 2-ны өдрөөс энэ сарын 5-ны өдрийг хүртэлх хугацаанд зарласан “Хүний төлөө зөв тус” баригдаж буй барилга байгууламжид хөдөлмөр аюулгүйн байдлыг хангуулах  аяны хүрээнд хийгдсэн ажил, илэрсэн зөрчлийн талаар мэдээлэл хийж, тэдгээр зөрчлүүдийг хэрхэн арилгах тухай саналыг холбогдох байгууллагуудад  хүргүүлсэн юм.   Тус газраас нийслэл хот болоод 21 аймагт баригдаж байгаа 275 объектод хяналт шалгалт хийсэн байна. Аяны хүрээнд 8 бүлэг 4 үе шаттай арга хэмжээ авч ажилласан бөгөөд нийт 2479 зөрчил илэрснээс хамгийн их буюу 670 нь техникийн аюулгүй байдлыг хангалтгүй байдал байжээ. Хяналт шалгалтад хамрагдсан аж ахуйн нэгжүүдийн 90 гаруй  хувь нь буюу 232 нь давтан хяналтанд орж байгаа компаниуд гэнэ. Ийнхүү давтан үзлэгт орж байгаа ч улсын мэргэжлийн байцаагчийн албан шаардлагыг биелүүлдэггүй, удаа дараалан зөрчил илэрч байгаа компаниуд байсаар байгааг Мэргэжлийн хяналтын газраас сануулж шийдвэртэй арга хэмжээ авч өгөхийг холбогдох байгууллагууд нь санал болгож байсан юм. Барилга, хот байгуулалтын яам /БХБЯ/ , Хөдөлмөрийн яам, Худалдан авах ажиллагааны газар, Нийслэлийн ерөнхий төлөвлөгөөний газар зэрэг барилга байгууламж барих, ашиглалтанд хүлээн авахад тодорхой хэмжээнд оролцдог төрийн байгууллагын төлөөллөөс гадна аяны хүрээнд ажилласан 30 гаруй мэргэжлийн улсын байцаагчид аяныг дүгнэх арга хэмжээнд хүрэлцэн иржээ. Дээрх төрийн байгууллага бүрт МХЕГ оролцооных нь дагуу авч ажиллах арга хэмжээг санал болгосон бөгөөд БХБЯ-нд дутагдал зөрчлөө арилгасан 9 компанийн үйл ажиллагааг сэргээхийг санал болгож, “Барилгын тухай хууль”-ийг ноцтойгоор зөрсөн “Чандмань цамхаг, “Нийслэл-Өргөө”, “Их наяд”, “Тайгам-Алтай”, “Есүй-Орд”, “Говь гурван сайхан”  зэрэг  11 байгууллагын тусгай зөвшөөрлийг цуцалж, үйл ажиллагаа явуулах эрхийг хасахыг санал болголоо. Тус команиуд нь барилга барих үйл ажиллагаа явуулж байх хугацаанд тус бүр 3 буюу түүнээс дээш хүний амь нас эрсджээ.
Мөн зөрчил илэрч байгаа ч эдгээр зөрчлөө арилгаж чадахгүй байгаа компаниудыг нэрийг дурдаж, салбарын яам хамтарч ажиллахыг сануулсан юм.
Улсын хэмжээнд өнгөрсөн 2014 онд 473 барилгын төслийн ажил эхлэсэн ч 216 нь хөрөнгө санхүүгийн боломжоос шалтгаалан үйл ажиллагаа нь зогссон байгаа гэнэ. Барилгын үйл ажиллагаа нь зогсож, “царцах” явдал байсаар байгаа тухай Сангийн яам болоод холбогдох төрийн байгууллагуудад санамж хүргүүлэхээ мэдэгдсэн. 
Тусгай зөвшөөрлийг нь цуцлахыг санал болгосон 11 компанийн нэрс