Эдийн засгийн өсөлт, хөгжилд нөлөөлөх зүйлд хөрөнгө оруулалт зүй ёсоор ордог. Улсын бүтээн байгуулалтыг авч яваа барилгын компаниуд эдийн засгийн хүндхэн үед зөв менежмент, цаг үеэ олсон оновчтой бодлогоор дотоодын болон гадаадын хөрөнгө оруулалтыг татах замаар шинэ бүтээн байгуулалтад чиглүүлж зөв менежмент хийх шаардлагатай цаг үе ирээд байна.  "Юу Эм Си Альфа” ХХК-ын гүйцэтгэх захирал Н.Монсортой үл хөдлөх хөрөнгийн зах зээл болон хөрөнгө оруулалтын талаар сонирхолтой яриа өрнүүллээ. 

"Юу Эм Си Альфа” ХХК нь 2009 онд дотоодын үл хөдлөх хөрөнгийн зах зээлд хөрөнгө оруулалт хийх, зуучлах,  хөрөнгө оруулалтын менежментийн үйлчилгээ үзүүлэх, зөвлөх үйлчилгээний чиглэлээр үйл ажиллагаа явуулахаар үүсгэн байгуулагдсан. Эдүгээ тав дахь жилдээ  үйл ажиллагаагаа амжилттай явуулж байгаа компани юм.

- Эдийн засгийн хямралтай байгаа өнөө үед барилгын компаниуд хэрхэн зөв менежменттэй ажиллах вэ?

Нэгдүгээрт: Эдийн засгийн хямрал гэдэг бизнесийнхэнд ухаарал бэлэглэж байх ёстой. Хүмүүс үүнээс суралцах хэрэгтэй. Ухаарал гэдэг нь компаниуд чадавхаа сайжруулж, туршлага хуримтлуулж байх ёстой. Нэг үгээр хэлбэл  компани тус бүрийн хамгийн чухал капитал юу болохыг сайн тооцоолж түүнээсээ үргэлж суралцах хэрэгтэй. 
Салбарын хувьд анхаармаар зүйл гэвэл захиалагч, гүйцэтгэгч гэсэн субъектээс бүрдэхээ больсон. Үүнийг сайн ойлгож, ухуулах шаардлага гарч байна. Эдийн засгийн чуулганаар  хөрөнгө оруулалтын сангийн талаар онцолж байсан.  Яригдалгүй өнгөрсөн зүйл гэвэл хөрөнгийн зах зээлийн биржийн талаар  түлхүү ярих ёстой. Ингэснээр дотоодод байгаа хөрөнгө оруулалт хийх боломжтой сул капиталыг  олж харах боломж бүрдэх юм.  

- Хөрөнгө оруулагчид юуг анхаарч хөрөнгө оруулалт хийдэг вэ?

Хөрөнгө оруулагчид үл хөдлөх хөрөнгийн салбарт хамгийн түрүүнд үнэлгээг эхэлж харна. Үнэлгээ бол газрын бүсчлэлээсээ хамаардаг. Өндөр зэрэглэлийн орон сууцны хороолол барьлаа гэхэд тухайн орон сууцны хороолол хотоос зайдуу боловч гадны хүн тэнд байх сонирхол хэр байна гэдгийг харгалзан үзэж судалсны эцэст үнэлгээгээ хийдэг. Үүнээс улбаалж бүсчлэл байнга хувьсан өөрчлөгдөж байдаг зүйл юм.

- Барилгын салбарт хөрөнгө оруулалт маш чухал. Хөрөнгө оруулалт татахын тулд  юуг анхаарах хэрэгтэй вэ?

Монгол улс хөрөнгө оруулалтыг татахын тулд  зөвхөн Монгол руу биш гадны хөрөнгө оруулалтын салбарт бид  эн зэрэгцэхүйц  хэмжээний байх ёстой гэж бодож байна. Мөн хөрөнгө оруулалтын таатай орчин бүрдүүлэх нь маш чухал. Дотоодын хөрөнгө оруулалтад эрх зүйн таатай орчинг  бүрдүүлж өгөх хэрэгтэй.

  - Танай байгууллага үл хөдлөх хөрөнгийн судалгаа хийдэг. Үл хөдлөх хөрөнгийн зах зээлийн төлөв байдал ямар байна ?

Эдийн засгийн сууриа харвал миний хувьд би маш өөдрөгөөр хардаг. Эдийн засгийн хүндрэлтэй байгаа өнөө үед орон сууцны худалдан авалт буурсан хэдий ч энэ нь түр зуурынх гэж харж байна. Орон сууцны хэрэгцээ байгаа учраас энэ бол зах зээлийн нэг шалгуур үзүүлэлт юм.

- Танай компаниас сар бүр оффисын зах зээлийн судалгаа гаргадаг. Улаанбаатар хотын хэмжээнд оффисын зах зээлийн үнэ ханш буурсан үзүүлэлтэй байгаа. Цаашид энэ байдал хэр удаан үргэлжлэх бол?

Оффис хүнтэй байхын тулд бизнес өөрөө хэвийн ажиллагаатай байх ёстой. Тэгэхээр одоо бизнес хэвийн ажиллагаатай бус бизнесийн салбар хүндэрсэн байна. Эргүүлээд зах зээлийхээ жамаар эрэлт, нийлүүлэлтийн хуулиндаа захирагдаад эрэлт буурчихаар хоосон нийлүүлэлт бий болно. Үүнээс улбаалж  хоосон оффисын хямрал гарч ирж байна. Түүнээс бодитой хэрэгцээ шаардлага байгаа юу гэвэл байгаа. Барууны жишигт нийцсэн стандартын оффис эрэлттэй байна. Цаашид ч энэ төрлийн оффисын барилгууд нийлүүлэгдэх байх. Манай эдийн засаг үргэлж өнөөдрийнх шиг байхгүй. Томоохон уул уурхайн төслүүд нь хэрэгжээд эхэлвэл түүн дээрээ түшиглэж, эдийн засгаа солонгоруулаад байдал дээрдэнэ. Үүнээс үүдэж оффисын зах зээлийн хэрэгцээ шаардлага бий болох нь лавтай.