“Улаанбаатар хөрөнгө оруулалт 2015” чуулган энэ сарын 15-нд болно. “Хөгжлийн төлөө түншлэл” уриан доор анх удаа зохион байгуулагдах уг чуулган нийслэлийн эдийн засгийн хөгжлийг дэмжих, төр хувийн хэвшлийн хамтын ажиллагааг хөгжүүлэх, хөрөнгө оруулалт, бизнесийн таатай орчинг бүрдүүлэхэд чиглэх аж. Улмаар Улаанбаатар хотыг бүс нутгийн бизнесийн төв болгон хөгжүүлэх хэтийн зорилготой юм.

Чуулга уулзалтад УИХ, Засгийн газрын гишүүдээс гадна ОУ-ын байгууллагын төлөөлөгчид, Монгол Улсад суугаа Онц бөгөөд бүрэн эрхт Элчин сайд нар, хувийн хэвшил, бизнес эрхлэгчид гээд нийт 1000 орчим төлөөлөгч оролцоно. Энэ  үеэр нийслэл хот хэрэгжүүлэхээр төлөвлөж буй хөгжлийн төсөл хөтөлбөрүүдээ хувийн хэвшлийнхэнд  танилцуулж хамтран ажиллах боломжийн талаар ярилцах аж. Мөн одоо хэрэгжиж буй төсөл хөтөлбөрүүдэд тулгамдаж буй асуудалд гарц эрэлхийлж, хууль эрх зүйн орчинг хэрхэн сайжруулах талаар хэлэлцэж Улаанбаатар хотын Түншлэлийн тунхаглал гарган, хувийн хэвшлийнхэнтэй хамтран ажиллах санамж бичиг байгуулах аж.

Энэ чуулга уулзалт болсноор Улаанбаатар хотын цаашдын бүтээн байгуулалт, хөгжлийн төлөвлөгөө, түүнийг хэрэгжүүлэхэд шаардлагатай төслүүдийг танилцуулах боломжтой  болох аж. Түүнчлэн нийслэлийн эдийн засгийн чадамжийг сайжруулах, хувийн хэвшлийнхэнтэй хамтран ажиллахад томоохон түлхэц үзүүлнэ гэж зохион байгуулагчид үзэж байна.

Дашрамд, дээрх арга хэмжээг Улаанбаатар хотын Худалдааны танхимын санаачилгаар  нийслэлийн ЗДТГ хамтран зохион байгуулж буй юм.