2003 оны 6-р сараас манай улсад  орон сууцны ипотекийн зээл хэрэгжсэнээр хойш өдгөө 40 мянга гаруй өрх хамрагджээ. Арилжааны банкуудаас сар бүр 80-90 орчим тэрбум төгрөгийн зээлийг ипотекийн зээлд зориулж олгодог байна. Энэ нь нийт банкны салбарын зээлийн 22,5 хувийг эзлэдэг гэнэ. Манай улс ипотекийн зээлийн Америк загварыг авч ашигласан бөгөөд Азийн орнуудаас Малайз улс хамгийн амжилттай хэрэгжүүлж байгаа орны жишээ юм.
        Ипотекийн зээлд хамрагдсан 40 гаруй мянган иргэн жил бүр банкинд хоёр төрлийн даатгалыг төлдөг. Энэ даатгалыг төвөгшөөлгүйгээр төлж байхыг мэргэжилтнүүд сануулсан. Манайд  урт хугацаатай даатгалын систем хөгжөөгүй учир жил бүр ийнхүү даатгалуулах шаардлага гардаг бөгөөд уг хоёр даатгал нь үл хөдлөх хөрөнгө, зээлдэгчийн амь насны даатгал юм.        Өөрөөр хэлбэл таны урт хугацааны зээлээр худалдан авсан үл хөдлөх хөрөнгө гэнэтийн осолд өртсөн тохиолдолд даатгалын   компаниар төлүүлэх боломж мөн зээлдэгч нас барсан тохиолдолд үр хүүхэд болон тэрхүү хөрөнгийг өвлөж үлдэх хүмүүс үлдсэн зээлийн төлбөрийг даатгалын компаниар төлүүлэх боломж юм. Мэдээж одоохондоо ипотекийн зээлд хамрагдсан хүн бүр энэ хоёр даатгалд мөнгө төлж байгаа ч нэг их төвөгшөөх, дургүйцэх хэрэггүй юм байна. Ирээдүйд юу болохыг хэн ч хэлж мэдэхгүй шүү дээ.