Мэргэжлийн хяналтын ерөнхий газар үйл ажиллагаандаа шинэчлэл хийх зорилгоор Хяналтын хуудсыг бүх салбарт нэвтрүүлсэн.   Энэхүү хуудас нь хяналт шалгалтын байгууллага, улсын байцаагчийн үйл ажиллагааг ил тод байлгахаас гадна хяналтын хуудсаар дамжуулж хууль тогтоомж, стандартыг аж ахуйн нэгж байгууллагад сурталчлах, хяналтын хуудсыг хяналт шалгалт хийхээс өмнө бизнес эрхлэгчдэд урьдчилан хүргэснээр дотооддоо зөрчлөө илрүүлж засах боломжтой хэмээн үзэж байгаа юм.
    Хяналтын хуудас үр дүнгээ өгч байгаа эсэх талаар Дэлхийн банкны бүлгийн гишүүн Олон улсын санхүүгийн корпораци, Хүнсчдийн холбоо хамтран нэг сарын турш судалгаа хийжээ. Судалгаанд нийслэл, орон нутагт сүү, мах, газар тариалан, жижиглэн худалдаа, хоол, хүнс зэрэг чиглэлээр үйл ажиллагаа явуулдаг 304 аж ахуйн нэгж хамрагдсан бөгөөд 92 хувь нь Хяналтын хуудас нэвтэрснээр шалгалт илүү тодорхой болж дарамт багассан гэж хариулсан байна. 54.8 хувь нь дарамт багассан, 37.65 хувь нь хяналт шалгалт ойлгомжтой, оновчтой болсон гэсэн бол 10.75 хувь нь илүү хүнд сурталтай гэж үзэж байгаагаа илэрхийлжээ.
   Харин барилгын салбарыг энд хараахан хамруулаагүй байна. Үнэхээр хяналтын хуудас нэвтэрснээр шалгалт тодорхой болж байгаа болов уу? гэдэг асуулт барилгын салбарт одоохондоо хэвээр үлдлээ. Гэхдээ та бүхэн санал бодлоо чөлөөтэй илэрхийлж болно шүү дэ.  Мөн та өөрийн үйлдвэрлэл үйлчилгээнд хяналт тавихад ашиглах хяналтын хуудсыг http://inspection.gov.mn/ сайтаас үнэ төлбөргүй татан авч дотоодын хяналт шалгалтдаа ашиглаж болно.