- Баянхонгор аймгийн  хавар­­жилт, мал төллөлт, тариалалтын ажил хэрхэн өрнөж байна вэ?

Энэ жил аймгийн хэмжээнд 3,4 сая толгой мал өвөлжиж, хаваржиж байна. Аймаг сумын орон нутгийн хөгжлийн сан, малчдын нөөц бололцоонд тулгуурлан 974,2 тн өвс, 256,1 тн тэжээл бэлтгэсэн. Энэ онд өвөлжилт хүндрэлгүй сайхан болж өнгөрлөө.
Аймгийн хэмжээнд 1410429 толгой мал төллөхөөс 4 сарын 30-ны байдлаар 1002652 толгой мал төллөж мал төллөлт 71 хувьтай, 989582 төл бойжиж төл бойжилтын хувь 98,6 хувьтай байна. 7 хоног бүрийн пүрэв гаригт Хүнс, хөдөө аж ахуйн яаманд мал төллөлтийн мэдээг мэдээлж байгаа.

- Энэ онд хийгдэх бүтээн байгуулалтын ажлуудын талаар ярихгүй юу?

Баянхонгор аймагт 2015 онд хийгдэх бүтээн байгуулалтын ажлуудаас дурьдвал: Замын ажлын хүрээнд аймгийн төвийн 10 км авто замын ажил, төв цэцэрлэгт хүрээлэнгийн тохижилт, аймгийн төвийн 2,1 км авто замын үргэлжлэл зэрэг ажлуудыг хийнэ. Мөн энэ онд сургууль цэцэрлэгийн барилга барих тал дээр ихээхэн анхаарч байна. Энэ ажлын хүрээнд 960 хүүхдийн сургууль цэцэрлэгийн барилгын өргөтгөлийн ажлыг Шинэ жинст суманд хэрэгжүүлнэ. Эрүүл мэндийн салбарт мөн адил ихээхэн ач холбогдол өгч байгаа.

Гурванбулаг суманд 100 ортой эмнэлэг,  сумын эрүүл мэндийн төв барилгын ажил, Баянцагаан суманд 14 ортой эмнэлэг, Жинст сум, Баянхонгор сумын 3-р багт өрхийн эмнэлэг зэрэг бүтээн байгуулалтын ажлуудыг өрнүүлэх юм.  Соёл урлагын салбарт соёлын төвийн барилга гэх мэтчилэн бүтээн байгуулалтыг улсын болон орон нутгийн төсвийн хөрөнгөөр нийт 7,617 тэрбум төгрөгийн хөрөнгө оруулалтын ажил хийгдэнэ.
 
- Эдийн засгийн хүндрэлтэй байгаа үед ямар бодлого баримтлан ажиллаж байна ?

Манай аймгийн эдийн засгийн гол салбар бол ХАА тэр дундаа мал аж ахуйн салбар энэ үүднээсээ малчдыг чадвахжуулах эрсдлээс сэргийлэх зорилгоор олон арга хэмжээ төлөвлөж байна. Энэ жилийг малчдын хөгжлийг дэмжих жил болгон зарлаж, хөтөлбөр төлөвлөгөөгөө боловруулан ажиллаж байгаа.  Үүний зэрэгцээ малын гаралтай түүхий эд цагаан идээг гадаад зах зээлд гаргахаар ажиллаж байна.

Өнгөрсөн онд БНХАУ-ын ӨМӨЗО-ын Алша аймгийн Эзнээ хошуунд аймгийн малчдын цагаан идээний үзэсгэлэн худалдааг гаргаж 100 гаруй сая төгрөгийн борлуулалт хийсэн. Энэ жил энэ ажлыг өргөжүүлж, худалдаалах цагаан идээний боловсруулалт, сав баглаа боодлыг сайжруулан борлуулалтын хэмжээг нэмэгдүүлэх зорилт тавин ажиллаж байгаа юм.
Мөн орон нутгийн бизнес эрхлэгчдийг дэмжих зорилгоор барилгын материалыг хөнгөлөлттэй үнээр эргэн төлөгдөх нөхцөлтэйгөөр орон нутгийн аж ахуйн нэгжүүдэд нийлүүлэх бодлого хэрэгжүүлж байна. Энэ үүднээс аймгийн бизнес эрхлэгчдийн зөвлөгөөнийг зохион байгуулж, “Баялаг бүтээж Баянхонгороо хөгжүүлье” гэсэн уриалга дэвшүүлж байна.

- Иргэдээ орон сууцжуулах тал дээр хэрхэн ажиллаж байна. Энэ онд хичнээн айлын орон сууц ашиглалтанд орохоор байна ?

Иргэдийг орон сууцжуулах талаар 2013 оноос орон нутгийн барилгын компаниудыг дэмжин ажиллаж байна. 2013 оны 01 сарын 01 ээс 2015 оны 03 дугаар сарын 31-ийг хүртэл нийт 1180 айлын орон сууц ашиглалтад ороод байна. Эдгээр орон сууцны барилгын ажилд өөр аймаг болон Улаанбаатар хотоос нэг ч компани оролцоогүй зөвхөн манай аймгийн орон нутгийн аж ахуй нэгжүүд бүтээн байгуулалтыг хийснээрээ онцлогтой. Мөн 2014 онд Хонгор сумын 1000 орон сууцны хорооллын гадна инженерийн шугам сүлжээг барих ажил эхэлсэн бөгөөд энэ ажил дуусах юм бол шинэ хороолол баригдах нөхцөл бүрдэх бий болох юм.  

Одоогийн байдлаар тус хороололд нийт 144 айлын орон сууц  ашиглалтад ороод байна. Энэ жил Төрийн орон сууцны корпорацаас  нэмж 120 айлын орон сууц барихаар тооцоо судалгааны ажил хийгдэж байгаа. Мөн орон нутгийн аж ахуй нэгжийн хөрөнгө оруулалтаар 127 айлын орон сууцны барилгын ажил эхлээд байна. Үүний зэрэгцээ хөдөө сумдад орон сууц барих ажлыг энэ оноос эхлэн “АТМОР” ХХК-тай хамтран хэрэгжүүлж байгаа бөгөөд аймгийн 19 сумаас 13-т нь цэвэр бохир ус, халаалтын систем бүхий 1 давхартаа 27 хүний мини кино театр бүхий үйлчилгээний төвтэй 24-н айлын 5 давхар орон сууц баригдана. Энэхүү төслийн үр дүнд сумын иргэд өөрийн сум, орон нутагтаа тохилог, сайхан амьдрах нөхцлийг бүрдүүлэхийн зэрэгцээ малчид ипотекийн зээлд хамрагдах боломжтой болж байгаагаараа онцлог юм.