Өнөө үед технологийн асар хурдтай хөгжил нь бидний ахуйн салшгүй хэсэг болж, өдөр тутмын ажил амьдралд улам гүн нэвтэрсээр байгаа билээ.

      "Барилга-Экспо-2015” ОУ-ын үзэсгэлэнгийн 2 дахь өдөр буюу өнөөдөр өглөөний 09:30-10:50 цагийн хооронд "Мишээл-Экспо" төвийн үзэсгэлэнгийн танхимын хурлын зааланд амины болон орон сууцны хороолол, оффисын барилгыг холбоожуулах шинэ суурилуулалтын технологи, хэрэглэгддэг бүтээгдэхүүний талаар танилцуулах сургалтыг "Монкабель системс" ХХК-ийн гүйцэтгэх захирал Э. Пүрэвдорж, инженер Г. Бат-Эрдэнэ нар зохион байгууллаа.

      Тус танилцуулах сургалтаар FTTH (Fiber To The Home) технологи нь айл, цаашлаад өрөө бүрт шилэн кабелийн холболт оруулах шийдэл бөгөөд үүний ачаар хэрэглэгчид өндөр хурдны интернэт, ай пи ТВ ашиглах, өөрийн хүссэн ISP компанийг сонгон үйлчлүүлэх зэрэг давуу талуудыг олгохоос гадна барилгын компаниуд энэхүү шийдлээр сүлжээгээ байгуулснаар холбооны угсралтын зардлыг хэмнэх, барилгад олон удаа сүлжээний утас татахгүй, эмх цэгцтэйгээр холбоо, дохиоллын дэд бүтцээ шийдэх, мөн тэжээл хэрэглэдэггүй сүлжээтэй болох гэх мэт ач тустай юм.