Барилга, хот төлөвлөлт, барилгын материалын үйлдвэрлэлийн салбарт нэвтэрч буй орчин үеийн дэвшилтэт техник, технологи, барилгын материал, ажил үйлчилгээг сурталчлах, олон нийтэд таниулах, мэдээлэл солилцох, аж ахуйн нэгж байгууллагуудын хамтын ажиллагааг өргөжүүлэх  зорилгоор зохион байгуулж байгаа “БАРИЛГА-ЭКСПО 2015” олон улсын үзэсгэлэн яармагт хүрэлцэн ирсэн зочид, төлөөлөгчид Та бүхэнд чин сэтгэлийн мэндчилгээ дэвшүүлж, эрүүл энх, аз жаргал, ажлын өндөр амжилтыг хүсэн ерөөж мэндчилье.
    Найм дахь жилдээ зохион байгуулагдаж байгаа энэхүү үзэсгэлэн яармагт барилгын салбарын бизнес эрхлэгчид, үндэсний үйлдвэрлэгч 250 гаруй аж ахуйн нэгж, байгууллага оролцож байгаа бөгөөд чанар, стандартын шаардлагад нийцсэн барилгын материал, бүтээгдэхүүн, дэвшилтэд техник технологи, орчин үеийн шийдэлтэй барилга, орон сууцны төслүүд олноор тавигдаж байгаа нь барилгын салбарын хөгжлийг шинэ түвшинд хүргэхэд чухал ач холбогдолтой юм.
 
    Монгол Улсын Засгийн газрын үйл ажиллагааны хөтөлбөрт тусгагдсан барилгын салбарын өмнө тавигдаад байгаа зорилтуудыг хэрэгжүүлэхийн тулд салбарын хууль, эрх зүйн орчинг боловсронгуй болгох, барилгын материал үйлдвэрлэгч, бүтээгчдийг татварын орчинд дэмжих бодлого, зохицуулалтаар ханган, зохион байгуулж хэрэгжүүлэх, үл хөдлөх эд хөрөнгийн салбарт гадаадын зээл, хөрөнгө оруулалтыг татах, норм, стандарт шинэчлэх зэрэг хийж бүтээх, санаж сэдэх ажлууд багагүй байгааг онцлон тэмдэглэж байна.
 
      “Барилга-Экспо 2015” олон улсын үзэсгэлэн яармаг нь барилгын салбарын хөгжлийг илтгэж, барилгачдын нэр хүндийг өсгөн, олон нийтийн сонирхлыг татаж, бүтээн байгуулалт, бүтээгдэхүүн ажил үйлчилгээний чанар, хүртээмжийг нэмэгдүүлэхэд түлхэц болно гэдэгт итгэлтэй байна.
 
      Барилгын салбарын бизнес эрхлэгч Та бүхэн “Барилга-экспо 2015” олон улсын үзэсгэлэн яармагийн үйл ажиллагаанд идэвхтэй оролцож, бизнесийн түншлэл, үйл ажиллагаагаа өргөжүүлэн, бүтээгдэхүүн, ажил үйлчилгээгээ сурталчлан, мэдээлэл солилцох таатай боломжийг үр дүнтэй ашиглахыг уриалж байна. 
 
    “Барилга-экспо 2015” олон улсын үзэсгэлэн яармагийн үйл ажиллагаанд оролцогчдод болон зохион байгуулагчдад ажлын өндөр амжилт хүсэн ерөөе. 
Сайн үйлс бүхэн дэлгэрэх болтугай.
 
БАРИЛГА, ХОТ БАЙГУУЛАЛТЫН САЙД Д.ЦОГТБААТАР
 
2015 оны 04 дүгээр сарын 24.