Нийслэлийн тэргүүлэгчдийн ээлжит хуралдаан өнөөдөр “Хангарьд” ордон болж өнгөрлөө. Хуралдаанаар Гэрлэх ёслолын ордон, Усан спорт сургалтын төв, Ионсей найрамдал эмнэлэг тэргүүтэй 19 объектыг хувьчлах эсэх асуудлыг хэлэлцэх байсан боловч дараагийн хуралдаан хүртэл хойшлууллаа. Учир нь эдгээр объектыг хувьчлах эсэх нь олны анхаарлын төвд байгаа учраас Иргэдийн төлөөлөгчид дахин нарийн судлах шаардлагатай гэж үзжээ. Энэ үеэр нийслэлийн Засаг даргын Санхүү эдийн засаг хариуцсан орлогч Н.Батаа “Энд нэг зүйлийг тодруулж хэлэхэд Хуримлах ёслолын ордон нь 46 саяын ашиггүй ажилласан гэдэг нь Үндэсний аудитын газраас гаргасан хагас жилийн ажлын тайлан байсан бөгөөд жилийн эцэст уг байгууллага маань 400 орчим сая төгрөгийн ашигтай ажилласан байгаа.  Тухайн газрыг хувьчлана гэхээр иргэд олон нийт бүрэн хувьчлах юм шиг ойлгоод байна. Бид 30-40 хувийн хувьцааг нь хувьчилж, менежментийг нь хувьд шилжүүлэх саналтай байгаа бөгөөд ингэснээр нийслэлд ирэх үр өгөөж нь илүү сайжрах болов уу хэмээн харж байгаа гэсэн юм”. Түүнчлэн уг хуралдаанаар “Төрийн албан хаагчдад Улаанбаатар орон сууцны сангаас хөнгөлөлт үзүүлэх журам”-ыг баталсан. Тун удахгүй бид энэхүү журамыг бүхэн эхээр нийтлэх болно.