Хаврын улирал эхлэж нийслэл хот  ногоон байгууламжаар өнгөө засахаар бэлтгэж байна. Энэ жил Улаанбаатар хотын 92 гудамж  цэцэрлэгт ногоон байгууламжийн тарилт, арчлалт хамгаалалтын ажлыг хийхээр төлөвлөжээ.

          Хаврын улиас хэлбэржүүлэлтийн ажил гуравдугаар сарын 10-аас эхлүүлсэн бөгөөд  дөрөвдүгээр сарын 1-ээс цэнэг усалгааг хийж, нийт зүлэгт талбайг самнаж цэвэрлэн, 10-аас мод бут, сөөг, ургамлан хашлагыг шинээр болон нөхөн тарих ажил хийгдэнэ.
       Хотын гудамж талбайд энэ жил нийт 500-аад мянган мод сөөг тарихаар төлөвлөж байна. Харин дөрөвдүгээр сарын 20-ноос гудамж талбайн модыг шохойдож,  тавдугаар сарын нэгнээс ногоон байгууламжийн хөрсийг ариутгах ажлыг хийсний дараа  зургаадугаар сарын нэгнээс зүлэг тарьж, тавнаас цэцэг тарих юм. Ойролцоогоор 300-аад мянган м2 зүлэг, 400-аад мянган ширхэг цэцэг тарихаар төлөвлөж байна.  Зургаадугаар сарын 15-аас наймдугаар сарын 15 хүртэл хоёр сарын турш зэрлэг ургамлыг устгах ажлыг хийнэ.